სენტ-ტრუიდენის მწვრთნელმა იბერია 1999-ის ძლიერ მხარეებზე ისაუბრა.
უეფა-ს კონფერენს ლიგის ძირითადი ეტაპის სადებიუტო მატჩის წინ, ბელგიური სენტ-ტრუიდენის მთავარმა მწვრთნელმა ფრედერიკ დე მეიერმა პრესკონფერენციაზე თბილისის იბერია 1999-თან დაპირისპირებაზე ისაუბრა.
ბელგიელმა სპეციალისტმა აღნიშნა, რომ ეს მატჩი კლუბისა და ქალაქისთვის ისტორიული მოვლენაა, გუნდში ენთუზიაზმი უმაღლეს დონეზეა და საკუთარი გულშემატკივრების წინაშე გამარჯვებისთვის ყველაფერს გააკეთებენ.
დე მეიერის თქმით, Wyscout-ის მეშვეობით ქართული კლუბი დეტალურად შეისწავლეს:
ეს არის გუნდი, რომელიც შემტევ ფეხბურთს თამაშობს, დაცვის ხაზში შესაბამისი გამოცდილების მქონე ფეხბურთელები ჰყავს, ხოლო ნახევარდაცვასა და შეტევის ფლანგებზე ტექნიკური და სწრაფი მოთამაშეები. ვართ თუ არა ფავორიტები? არ ვიცი. დანამდვილებით მხოლოდ ის ვიცი, რომ იბერია 1999-ს სათანადოდ დავაფასებთ. ერთადერთი უპირატესობა, რაც გვაქვს, საკუთარ კედლებში თამაშია.
მიუხედავად იმისა, რომ ბელგიურ კლუბს შიდა ჩემპიონატში რთული პერიოდი აქვს (ბოლო 5 მატჩიდან 4 წაგება), დე მეიერმა აღნიშნა:
ჩვენ რთულ პერიოდში ვართ, მაგრამ ეს ისტორიული მომენტი თავდაჯერებულობის მოსაპოვებლად უნდა გამოვიყენოთ. არ უნდა ვიფიქროთ ბევრ რამეზე და, უპირველეს ყოვლისა, ისევ ჩვენი სტილით ვითამაშოთ. ეს ძალიან მნიშვნელოვანი იქნება.
შეხვედრა 15 ოქტომბერს, თბილისის დროით 23:00 საათზე დაიწყება.
