ტონი და მარკო - კონტრასტული გამომშვიდობება ორ ლეგენდასთან

ხვალ, უემბლიზე, ჩემპიონთა ლიგის ფინალში, ორი დიდებული გერმანელი ფეხბურთელის განსხვავებული ეპოქა დასრულდება.

თბილისის დროით 23:00 საათზე ტონი კროოსის მადრიდის რეალი მარკო როისის დორტმუნდის ბორუსიას დაუპირისპირდება.

უყურე მატჩის პირდაპირ ტრანსლაციას adjarabetarena-ზე, სრულიად უფასოდ

დამშვიდობება 

ორივე გერმანელმა წასვლა ფინალამდე გარკვეული დროით ადრე დაადასტურა - მარკო როისმა თქვა, რომ ჩემპიონთა ლიგის ფინალი მისთვის ბორუსიას მაისურით ბოლო მატჩი იქნებოდა - მარკოს შავ-ყვითელი, 12 წლიანი კარიერა შეიძლება მისთვის ყველაზე დიდი ტიტულით დასრულდეს.

ტონი კროოსი რეალს კი არა, ზოგადად ფეხბურთს ემშვიდობება. ყოველ შემთხვევაში, ხვალ საკლუბოს ნამდვილად - გერმანელ მაესტროს სანტიაგო ბერნაბეუზე გულისამაჩუყებელი გამომშვიდობება უკვე მოუწყვეს და რეალის მაისურით მას, როისის მსგავსად, ერთი მატჩის ჩატარება დარჩა. ხვალის შემდეგ, ტონის ხილვას მხოლოდ ევროპის ჩემპიონატზეღა შევძლებთ, რის შემდეგაც ის კარიერას ლურსმანზე 34 წლის ასაკში და უმაღლეს დონეზე თამაშის დროს ჩამოკიდებს. თუმცა, ის თავიდანვე ამბობდა, რომ მაღალ დონეზე ყოფნისას სურდა წასვლა და ამიტომ, მისმა გადაწყვეტილებამ გული მილიონობით ადამიანს დაწყვიტა, მაგრამ მოულოდნელი თითქმის არავისთვის ყოფილა.

კონტრასტი

რამდენად ლამაზი ისტორიაა, როცა შენი ცხოვრების კლუბს ტიტულით, თანაც ჩემპიონთა ლიგით ემშვიდობები. ორივე ფეხბურთელი ამაღამ დაძინების წინ საკუთარ თავს ჩემპიონთა ლიგის თასით ხელში წარმოიდგენს. თუმცა, ამით მათ შორის საერთო მთავრდება და იწყება მხოლოდ განსხვავებები - ტონი კროოსისთვის ეს ჩემპიონთა ლიგა მისი კარიერული ტორტის თავზე უგემრიელესი ალუბლის როლს შეასრულებს. გერმანელი მაესტრო ლეგენდარულ ჩენდოს გაუთანაბრდება და ნაჩოსთან, ლუკა მოდრიჩთან და დანი კარვახალთან ერთად ისტორიაში ჩემპიონთა ლიგის 6 ტიტულით შევა. 

მარკო როისის კარიერა უიღბლობებით არის სავსე - ფეხბურთელს, რომელიც 12 წელია თავის აღმზრდელი კლუბის ერთგულია, მთელი პროფესიონალური კარიერაა უიღბლობები სდევს თან. როისი გერმანიის ნაკრებისთვის ტრიუმფალური მსოფლიო ჩემპიონატის წინ გამართულ ამხანაგურ შეხვედრაში დაიმტვრა და ტურნირის გამოტოვება მოუწია, რის გამოც ოქროს მედლის გარეშე დარჩა. წააგო ჩემპიონთა ლიგის ფინალი ბაიერნთან, გასულ სეზონში კი ბოლო ტურში თითქოს ხელში ჩაგდებული ნანატრი ბუნდესლიგაც გაანიავა. 

ვის უფრო სჭირდება (?) 

დავიწყოთ იმით, რომ ასეთი შეკითხვის დასმა თავიდანვე არასწორია - არ არსებობს ფეხბურთელი, რომელსაც ჩემპიონთა ლიგა ვინმეზე ნაკლებად სჭირდება. ეს არის საკლუბო ტურნირის აბსოლუტური ევერესტი და მისი მოგება ნებისმიერი კლუბის წარმატების საბოლოო წერტილია. ამიტომ, არაფერს ცვლის ის ფაქტი, რომ ტონის ეს ტიტული ხუთჯერ აქვს მოგებული, როისს კი არცერთხელ, რეალს 14-ჯერ, დორტმუნდს კი მხოლოდ 1-ხელ. ნებისმიერი ფეხბურთელი და გუნდი მოედანზე საბრძოლველად და გამარჯვების მოსაპოვებლად გადის, ამიტომ ეჭვიც არავის გვეპარება, რომ ტონი კროოსს ხვალ გადამწყვეტი პენალტის შესრულება რომ მოუწიოს, თანამემამულე მარკო როისი მის გონებაში საერთოდ არ იარსებებს. 

ნებისმიერ შემთხვევაში, ხვალინდელი საღამო ყველანაირ შემთხვევაში განსაკუთრებული იქნება. ჩემპიონთა ლიგის ფინალი ისედაც დიდი მოვლენაა, მაგრამ ფაქტი, რომ ორ დიდ გერმანელს დავემშვიდობებით და მათი უკანასკნელი ცეკვა უნდა ვიხილოთ, თამაშს და მოვლენას კიდევ უფრო განსაკუთრებულს ხდის.

კონტრასტი vol2

მარკო როისს და ტონი კროოსს თავიანთი გუნდების წლევანდელ წარმატებაში განსხვავებული როლი უკავიათ - დორტმუნდის ვეტერანი ძირითადად სკამიდან ერთვება და მოედანზე მაქსიმუმ ნახევარ საათს ატარებს, როცა ან შეტევის გამწვავებაა საჭირო, ან ბურთის დაჭერა, ან თანაგუნდელებს მოედანზე მისი გამოცდილება სჭირდებათ.

აბსოლუტურად საპირისპირო მდგომარეობაა მადრიდში, სადაც ტონი კროოსი კარლო ანჩელოტის მიერ შემუშავებული მექანიზმის საკვანძო ჭანჭიკია და ბევრს უჩნდება კითხვა, როგორ იმუშავებს ეს ყველაფერი გაისად, როცა ტონი წავა. თავად იტალიელი საუბარში დიდად იმედიანი არ ჩანს და ამბობს, რომ ტონისნაირი ფეხბურთელის ბაზარზე ძებნას აზრიც არ აქვს, იმიტომ რომ ფიზიკურად არ არსებობს. რთულია, არ დაეთანხმო, რად ღირს კროოსისგან თუნდაც ბაიერნთან პირველ მატჩში ვინისიუსზე გაკეთებული პასი, როცა ის ბრაზილიელს თითქოს პულტით მართავდა - ჯერ ამოიყვანა ცენტრისკენ, რათა მცველი ამოყოლოდა, შემდეგ თითით ანიშნა, საით უნდა წასულიყო და უზუსტესი პასით ნოიერთან პირისპირ გაიყვანა. ეს ის შემთხვევაა, როცა პასი გოლის სულ ცოტა 75-80%-ს შეადგენს.

ტონი კროოსს რეალის წლევანდელ წარმატებაში უმნიშვნელოვანესი როლი უკავია და ეჭვიც არავის ეპარება, რომ ხვალ ის სასტარტო შემადგენლობაში იქნება, განსხვავებით როისისგან, რომელსაც ცნობილი გამოცემები მატჩის სკამიდან დაწყებას უწინასწარმეტყველებენ, რაც ასევე კონტრასტულია. თუმცა ვინ იცის, იქნებ ედინ ტერზიჩიც სურპრიზს ამზადებს და მარკოს თავის ბოლო მატჩში საჩუქარს გაუკეთებს სასტარტოში დაყენების სახით - ერთი რაღაცის თქმა 100%-იანი ალბათობით შეგვიძლია - ტონი კროოსსაც და მარკო როისსაც ხვალ მოედანზე ნამდვილად ვიხილავთ. ჩვენგან მხოლოდ ის მოითხოვება, რომ სიამოვნება მივიღოთ და ვისიამოვნოთ, რადგან დრო ძალიან შეზღუდული გვაქვს - მინიმუმ 90 ან მაქსიმუმ 120 წუთი...