ჩემპიონთა ლიგის ნახევარფინალებამდე ცოტა დრო რჩება. მანამდე კი შემოგთავაზებთ იმ ფეხბურთელების ათეულს, რომლებსაც ექნებათ შანსი ამ სეზონის საუკეთესო ფეხბურთელის ჯილდო დაისკუთრონ და ისეთ ფეხბურთელებს სიას შეუერთდნენ, როგორებიც არიან ლიონელ მესი, კრიშტიანუ რონალდუ, ზინედინ ზიდანი თუ რონალდინიო…
10. ანტუან გრიზმანი
პატარა პრინცის ბოლო შანსი ჩემპიონთა ლიგის მოსაგებად. ანტუან გრიზმანი სწორედ ის ფეხბურთელია, რომელიც შესაძლოა ჩოლოს გუნდის წარმატების იქს-ფაქტორი აღმოჩნდეს.
9. უსმან დემბელე
ამ ჯილდოს უკანასკნელ მფლობელს ისეთივე ფეიერული სეზონი ვერ აქვს, როგორც წინა, თუმცა გადამწყვეტი მატჩები წინ არის და უსმან დემბელე სწორედ ის ფეხბურთელია, რომელსაც ასეთ შეხვედრებში სხვაობის შექმნა შეუძლია.
8. კილიან მბაპე
კილიანი ამ სიის ერთადერთი გავარდნილი წარმომადგენელია — 15 გოლი და 1 საგოლე გადაცემა. ბაიერნთან გატანილი 2 გოლის შემდეგ ფრანგი ერთ ნაბიჯში იყო კრიშტიანუს რეკორდთან.
7. დეკლან რაისი
მეთოფეების კაპიტანს კარგი შანსი ექნება ამ ჯილდოს დასაკუთრებისთვის, თუ მისი გუნდი წარმატებით დაასრულებს ჩემპიონთა ლიგის კამპანიას. უკვე სამი სეზონია, რაც ინგლისელი არსენალის ლიდერია და არაერთი პრესტიჟული ჯილდოს ფავორიტთა სიაში გვხვდება.
6. ვიტინია
პარი სენ-ჟერმენის ნახევარდაცვის მაესტრო უკვე მეორე სეზონია მსოფლიოს ერთ-ერთ საუკეთესო ნახევარმცველად მიიჩნევა და პარიზელთა თამაშში უდიდეს განსხვავებას ქმნის. ბევრის აზრით, სწორედ ის იყო გასული სეზონის საუკეთესო ფეხბურთელი. ბაიერნთან მატჩებში მასზე ისევ ძალიან ბევრი რამ იქნება დამოკიდებული.
5. დავიდ რაია
მეთოფეთა კარის დარაჯმა ამ სეზონში უკვე 8-ჯერ მოახერხა კარის მშრალად შენახვა და ერთი უგოლო მატჩი აკლია კეილორ ნავასის რეკორდის გამეორებამდე. შესაძლოა, ესპანელი მეკარე არსენალის წარმატების მთავარი ფაქტორი გახდეს.
4. მაიკლ ოლისე
მადრიდის რეალთან ბრწყინვალე პერფორმანსების შემდეგ ფრანგს უკვე 4 გოლი და 6 საგოლე გადაცემა დაუგროვდა ჩემპიონთა ლიგის ამ გათამაშებაში. Mr. Nonchalant ამჯერად მსოფლიოს საუკეთესო მარცხენა მცველს დაუპირისპირდება.
3. ხულიან ალვარესი
არგენტინელი ფორვარდი უდავოდ ჩოლოს გუნდის საუკეთესო ფეხბურთელია და ამას მისი სტატისტიკაც ადასტურებს — 13 მატჩში: 9 გოლი და 4 საგოლე გადაცემა. აწიოკებული ტოტენჰემი და არაამქვეყნიური საჯარიმო დარტყმა კამპ ნოუზე. ნახევარფინალური გამოცდის ჩაბარება კი ხულიანს ტურნირის საუკეთესო მეკარესთან მოუწევს.
2. ხვიჩა კვარაცხელია
ქართველი ლიგაზე ისტორიულ სეზონს ატარებს — ნახევარფინალებამდე 8 გოლი და 5 საგოლე გადაცემა სწორედ ის ციფრებია, რომლებმაც შესაძლოა მას ტურნირის MVP-ის ჯილდო მოუტანოს. კვარა პარიზელთაგან საუკეთესო იყო როგორც ჩელსისთან, ასევე ლივერპულთან დაპირისპირებებში, რაც არაერთ მატჩის საუკეთესო ფეხბურთელის ჯილდოში აისახა.
1. ჰარი კეინი
გასაკვირი არ არის, რომ ოქროს ბურთის მთავარი პრეტენდენტი ჩემპიონთა ლიგის საუკეთესო ფეხბურთელობის მთავარ ფავორიტად ითვლება. ჰარი ერთდროულად თამაშობს ექვსიანზე, რვიანზე და ცხრიანზე. ამის მიუხედავად, კეინმა 11 თამაშში 12 გოლის გატანა მაინც მოახერხა და რეკორდმაისტერს მე-7 ტიტულისკენ უძღვება.
