თოფურიასა და გეიჯის სიტყვიერი დაპირისპირება ინტერვიუს დროს

UFC Freedom 250-ის მოახლოებასთან ერთად, მთავარი ბრძოლის მონაწილეებს შორის სიტყვიერი დაპირისპირება სულ უფრო მწვავდება.

ღონისძიება, რომელიც 15 ივნისს თეთრი სახლის გაზონზე გაიმართება, მსუბუქი წონის სატიტულო ბრძოლით იქნება გამორჩეული, სადაც ჩემპიონი ილია თოფურია დროებით ჩემპიონ ჯასტინ გეიჯის დაუპირისპირდება.

ორივე მებრძოლი The Pat McAfee Show-ს ერთობლივ ინტერვიუში გამოჩნდა, თუმცა სხვადასხვა ლოკაციიდან. საუბარი თავიდანვე სიტყვიერი შეტევებით დაიწყო. თოფურიას აზრით, გეიჯიმ ზღვარი მაშინ გადაკვეთა, როდესაც ერთ-ერთ ბოლო ინტერვიუში მის განქორწინებაზე ისაუბრა.

„ვფიქრობ, ეს ყველაფერი პირადულში არ უნდა გადავიდეს. თუმცა საბოლოოდ ერთმანეთის დაზიანებას ვეცდებით და, გარკვეულწილად, ეს უკვე საკმაოდ პირადულია,“ - თქვა გეიჯიმ, როდესაც ბრძოლის წინ მიმდინარე სიტყვიერ ომზე ჰკითხეს.

„მაგრამ ეს ჩვენი სამუშაოა. მე არასდროს მითქვამს არაფერი პირადული. უბრალოდ, ბრძოლის კვირაში ძალიან დაუცველები და ემოციურები ვართ, ამიტომ ყველაფერს პირადად აღვიქვამთ.

არ აქვს მნიშვნელობა, რა ვთქვი ან არ ვთქვი, მაინც პირადად მიიღება. რასაც ის იტყვის, მეც პირადად მივიღებ, რადგან მხარზე ტვირთი მაწევს და ეს კაცი ჩემს ცემას ცდილობს,“ - განაგრძო გეიჯიმ.

მე შენგან არაფერს მივიღებ პირადად. არ ინერვიულო, არ ინერვიულო.

„აქ პირველი განსხვავება ისაა, რომ შენ ჩემს დაზიანებას ეცდები, მე კი რეალურად დაგაზიანებ. სწორედ ეს არის განსხვავება შენსა და ჩემს შორის. შენ რაღაცის გაკეთებას ეცდები, მე კი ამას გავაკეთებ.“ - შეაწყვეტინა თოფურიამ.

„ჯასტინს, როგორც მეტოქეს, პატივს ვცემ. ვფიქრობ, ამ სპორტისთვის ბევრი კარგი რამ გააკეთა, მაგრამ ჩვენს შორის დიდი განსხვავებაა. როგორც თვითონ თქვა, ის რაღაცების გაკეთებას ეცდება, მე კი გავაკეთებ. შედეგს მივიტან. არაფრის ცდას არ ვაპირებ, უბრალოდ გავაკეთებ,“ - განაცხადა თოფურიამ.

ამის საპასუხოდ გეიჯიმ თქვა:

„მას მართლა სჯერა ყველაფრის, რასაც ამბობს. ზის, საკუთარი თავით ტკბება და ჰგონია, რომ ღმერთია. მაგრამ ის ჩვეულებრივი ადამიანია, ზუსტად ჩემსავით. და ამას მაშინ დავანახებ, როცა მის ნიკაპს შევეხები, დაიძინებს, როგორც ნებისმიერი სხვა, როცა ჩემს დარტყმებს მიიღებს.“