ტორპედო ქამბექის იმედად, იბერია უპირატესობის შესანარჩუნებლად

დღეს უეფას კონფერენს ლიგის მეორე საკვალიფიკაციო ეტაპზე განმეორებითი მატჩები გაიმართება.

ქუთაისის ტორპედო რამაზ შენგელიას სახელობის სტადიონზე კვიპროსულ ომონიას მიიღებს და ორი მატჩის ჯამში სხვაობის აღმოფხვრას შეეცდება. კვიპროსში შეხვედრა მასპინძელთა გამარჯვებით 3-1 დასრულდა.

მამადუ სახო (ტორპედოს მცველი): “მოედნის მიღმა ბევრი საუბარი არ მიყვარს, თუმცა შემიძლია გითხრათ, რომ ხვალინდელ მატჩში სასურველი შედეგის მისაღწევად მაქსიმალურად დავიხარჯებით. ვართ თავდაჯერებულები, დანებებას არ ვაპირებთ… ფეხბურთი განსაკუთრებულია, მეორე შანსი გვეძლევა და პირველ მატჩში დაშვებული შეცდომების აქ გამოსწორებას ვეცდებით.

რთული მეტოქე გვყავს, მაგრამ მარტივი მატჩი არც ომონიას ექნება. აქ, ქუთაისში, ჩვენი გულშემატკივრის წინ, რომელიც ვიმედოვნებ, რომ სტადიონს გაავსებს, ყველაფერი შესაძლოა მოხდეს. ჩვენ მზად ვართ. მოვუწოდებ გულშემატკივარს, მოვიდნენ სტადიონზე.” - განაცხადა ფრანგმა ფეხბურთელმა, რომლის დებიუტიც ტორპედოში ომონიასთან პირველ მატჩში შედგა.

სტივ კინი (ტორპედოს მწვრთნელი): "პირველ რიგში, კვიპროსელ ჟურნალისტებს მოგესალმებით. ულამაზეს ქვეყანაში ჩამოხვედით და თუ აქ პირველად ხართ, საქართველო და ქუთაისი აუცილებლად დაგამახსოვრდებათ. შემიძლია აქ ყოფნა მოგილოცოთ.

ხვალ ბევრად განსხვავებული მატჩი იქნება. სახოს ვეთანხმები: ფეხბურთი მეორე შანსს გვაძლევს, პირველიდან კი სწორი დასკვნები გამოვიტანეთ და მზად ვართ დაშვებული შეცდომები გამოვასწოროთ. ქუთაისელი გულშემატკივარი ჩვენი უპირატესობაა: მათთან ერთად ყველაფერი შეგვიძლია. მჯერა, რომ სტადიონი სავსე იქნება. ჯერ არაფერია დასრულებული.” - განაცხადა შოტლანდიელმა სპეციალისტმა.

ტორპედოსა და ომონიას დაპირისპირება 21:00-ზე დაიწყება. ქუთაისური გუნდი შემდეგ ეტაპზე გასვლის შემთხვევაში უნგრულ ფეჰერვარს დაუპირისპირდება, რომელმაც აზერბაიჯანული სუმგაითი დაამარცხა.

დღეს მეორე ქართული გუნდიც იასპარეზებს. იბერია 1999 ალბანეთში ტირანას პარტიზანს ეწვევა. პირველი მატჩი ქართული გუნდის გამარჯვებით 2-0 დასრულდა. გოლები ნონიკაშვილმა და სილამ გაიტანეს.

იბერია გასვლით მატჩში უპირატესობის შენარჩუნებასა და შემდეგ ეტაპზე გასვლას შეეცდება. იბერიას მეტოქე მომდევნო ეტაპზე დიდი ალბათობით თურქული ბაშაქშეჰირი იქნება, რომელმაც სან მარინოს ლა ფიორიტას პირველ შეხვედრაში 6-1 მოუგო.

პარტიზანისა და იბერიას მატჩი სტარტს 22:00-ზე აიღებს.

დინამო ბათუმი კონფერენს ლიგას გამოეთიშა