პრემიერ ლიგაში გადარჩენისთვის მებრძოლ ტოტენჰემს სეზონის უმნიშვნელოვანესი მატჩის წინ მცირე იმედი მიეცა. გუნდის მცველი ჯედ სპენსი მზად არის მოედანზე სპეციალური დამცავი ნიღბით გავიდეს, მიუხედავად იმისა, რომ ყბის მოტეხილობა აქვს.
25 წლის ფეხბურთელმა მძიმე დაზიანება ჩელსისთან 1-2 წაგებულ შეხვედრაში მიიღო, როდესაც მატჩის 87-ე წუთზე მას სახეში ლუის დელაპის იდაყვი მოხვდა. ამ ეპიზოდში შეხვედრის მთავარმა არბიტრმა, სტიუარტ ატველმა ჩელსის თავდამსხმელი მხოლოდ ყვითელი ბარათით დასაჯა, რამაც გულშემატკივრებში დიდი უკმაყოფილება გამოიწვია. სპენსმა ტკივილის მიუხედავად შეხვედრა ბოლომდე ჩაამთავრა.
მიმდინარე სეზონში სპენსმა ტოტენჰემის მაისურით ყველა ტურნირზე 43 მატჩში მიიღო მონაწილეობა, თუმცა რობერტო დე ძერბის მოსვლის შემდეგ ძირითად შემადგენლობაში ადგილის დამკვიდრება გაუჭირდა. იტალიელი სპეციალისტი ფლანგებზე უპირატესობას დესტინი უდოგისა და პედრო პოროს ანიჭებს, რის გამოც ჯედმა გუნდის ბოლო 6 შეხვედრიდან მხოლოდ ერთი დაიწყო სასტარტო თერთმეტეულში.
სათამაშო პრაქტიკის ნაკლებობის გამო, სპენსი, სავარაუდოდ, მომავალ მსოფლიო ჩემპიონატს გამოტოვებს, მიუხედავად იმისა, რომ მარტის საერთაშორისო პაუზის დროს ინგლისის ნაკრებში გამოძახებული იყო.
სანამ ჩრდილო ლონდონური მეტოქე არსენალი პრემიერ ლიგის ჩემპიონობას ზეიმობს, ტოტენჰემი ბოლო ტურის წინ კატასტროფულ რეალობას უმკლავდება. დეზები გასავარდნ ზონას მხოლოდ 2 ქულით უსწრებენ.
პრემიერ ლიგაში ადგილის შესანარჩუნებლად ტოტენჰემს ბოლო ტურში, საკუთარ მოედანზე, ევერტონის დამარცხება სჭირდება. ფრის შემთხვევაშიც გუნდის შანსები დიდია, რადგან ვესტ ჰემთან შედარებით ბურთების გაცილებით უკეთესი ბალანსი აქვთ. თუ დე ძერბის გუნდი ევერტონთან დამარცხდება, ხოლო ვესტ ჰემი ლონდონ სტადიუმზე ლიდსს მოუგებს, ტოტენჰემი ჩემპიონშიპში გავარდება.
