ტრანსფერი ჩაიშალა - ნაპოლის ოფიციალური განცხადება

ნაპოლი იესპერ ლინდსტრომის შალკეში ჩაშლილი ტრანსფერის შესახებ ოფიციალურ განცხადებას ავრცელებს.

„ნაპოლის სურს განმარტოს იესპერ ლინდსტრომის შალკეში არშემდგარი ტრანსფერის მიზეზები, მას შემდეგ, რაც მედიაში არაზუსტი ინფორმაცია გავრცელდა.

კვირას მხარეებს შორის შედგა კომუნიკაცია კონტრაქტის ზოგად პირობებთან დაკავშირებით, რომლის დროსაც შემოთავაზებული ხელშეკრულების ფინანსურ და გადახდის პირობებზე არანაირი პრეტენზია არ გამოთქმულა.

შემდგომ, დღეს, ცენტრალური ევროპის დროით 13:00 საათზე, ნაპოლიმ გერმანული კლუბისგან მიიღო ინფორმაცია, რომ წარმოდგენილი პირობების ნაწილი მათთვის მიუღებელი გახდა. ამის მიზეზად კლუბმა დაასახელა შაბათ-კვირას ორი ფეხბურთელის ტრავმა, რის გამოც შეიცვალა მათი ტექნიკური და სპორტული საჭიროებები და, შესაბამისად, სატრანსფერო სტრატეგიაც.

13:22 საათზე ნაპოლიმ უპასუხა გერმანულ კლუბს, რომ მიუხედავად იმისა, რომ შეთანხმებაში შეტანილი ცვლილებები უმნიშვნელო იყო, მათი ახალი ტექნიკური მოთხოვნების გათვალისწინებით, მზად იყო შალკეს მიერ წარმოდგენილი ხელშეკრულების ვერსია მიეღო.

ამის მიუხედავად, 17:32 საათზე გერმანულმა კლუბმა დაადასტურა, რომ ახალი საკადრო პრიორიტეტებიდან გამომდინარე, ფეხბურთელის მიმართ ინტერესი აღარ ჰქონდა. ეს ნათლად აჩვენებს იმ რეალურ მიზეზებს, რის გამოც ტრანსფერი საბოლოოდ არ შედგა.

ვიმედოვნებთ, რომ ეს განცხადება ნათელს ჰფენს იმას, თუ ვის ეკისრება რეალურად პასუხისმგებლობა ამ ტრანსფერის ჩაშლაზე. ნაპოლი იტოვებს უფლებას, კომპეტენტურ ორგანოებში გამოიყენოს ყველა სამართლებრივი საშუალება საკუთარი ინტერესების დასაცავად.“ - წერია იტალიური კლუბის განცხადებაში.