წყალსათხილამურო სპორტი - ფოთში ევროპისა და აფრიკის ღია ჩემპიონატი დასრულდა

ფოთში, მალთაყვის ტერიტორიაზე გამართული ევროპისა და აფრიკის წყალსათხილამურო სპორტის ღია ჩემპიონატი საზეიმოდ დაიხურა.

24-26 ივლისს ჩატარებულ შეჯიბრებაში 20 ქვეყნის 120-ამდე სპორტსმენმა მიიღო მონაწილეობა, საქართველოს ღირსებას კი სამი ფოთელი - გენადი გურალია, ცოტნე ბერაია და გიორგი შონია იცავდნენ.

ტურნირის ორგანიზატორები იყვნენ საქართველოს წყალსათხილამურო სპორტის ეროვნული ფედერაცია და ფოთის ტბის კლუბი. ღონისძიება საერთაშორისო ფედერაციის (IWWF) პატრონაჟით მიმდინარეობდა.

ფოთს წყალსათხილამურო სპორტთან განსაკუთრებული ისტორიული კავშირი აქვს - 1991 წელს სწორედ აქ გაიმართა პირველი ევროპის ჩემპიონატი ამ სპორტის სახეობაში და წელს ამ ისტორიული მოვლენის საიუბილეო, 35-ე წელი აღინიშნება.

ჩემპიონატის დახურვის ოფიციალურ ცერემონიაზე მაყურებლის წინაშე "ქართული ნაციონალური ბალეტი - სუხიშვილები" წარდგა.