ინგლისის ეროვნული ნაკრების მთავარმა მწვრთნელმა, თომას ტუხელმა განაცხადა, რომ 2026 წლის მსოფლიო ჩემპიონატზე ტაქტიკური საიდუმლოებების დასაცავად, კანზას-სითის საწვრთნელ ბაზაზე უსაფრთხოების გამკაცრებულ ზომებს გაატარებს.
მას შემდეგ, რაც ჩემპიონშიპის პლეი-ოფში მიდლსბროს ვარჯიშებზე ჯაშუშობის გამო საუთჰემპტონი სკანდალურად მოკვეთეს, გერმანელი სპეციალისტი ყველაფერს აკეთებს, რათა ჯგუფური ეტაპის მეტოქეებმა, ხორვატიამ, პანამამ და განამ, ინგლისელთა გეგმები ნაადრევად არ გაიგონ.
ინგლისის ფეხბურთის ასოციაციამ (FA) ბაზა უკვე შეამოწმა. ვინაიდან მოედნები საკმაოდ ღია სივრცეში მდებარეობს, იგეგმება სპეციალური დამცავი ეკრანების დამონტაჟება და დაცვის თანამშრომლების რაოდენობის გაზრდა.
„ჩვენ ამაზე აუცილებლად ვიზრუნებთ. სტანდარტულ ვარჯიშებს, სტანდარტულების დამუშავებასა და პენალტების სერიისთვის მზადებას დახურულ კარს მიღმა ჩავატარებთ. არ გვინდა, რომ მეტოქემ წინასწარ იცოდეს ჩვენი ჩანაფიქრი, რადგან საიდუმლოება უმნიშვნელოვანეს უპირატესობას გვაძლევს“, - განმარტა ტუხელმა.
ფიზიკური უსაფრთხოების გარდა, მწვრთნელი გუნდის მენტალურ მომზადებაზეც ზრუნავს და სამწვრთნელო შტაბში ფსიქოლოგი რიჩ ჰემპსონი დაამატა, რომელიც ფეხბურთელების ქცევებსა და კომუნიკაციას დააკვირდება.
ამასთანავე, ტუხელმა გაამჟღავნა, რომ საბოლოო 26-კაციანი განაცხადის დასახელებამდე 50-მდე მოთამაშეს პირადად ესაუბრა. შექმნილია საიდუმლო სათადარიგო სია, სადაც მყოფ ფეხბურთელებს ტრავმების შემთხვევაში სასწრაფოდ გამოიძახებენ. გერმანელი სპეციალისტის თქმით, ამ სიაში მოთამაშეების გადაანაწილებაზე დიდი გავლენა მათმა პირველადმა რეაქციამ და იმედგაცრუების ღირსეულად მიღებამ მოახდინა.
