უეფამ განაცხადა, რომ გადაწყვეტილება იმის შესახებ, ჩატარდება თუ არა და სად ჩატარდება ფინალისიმა ესპანეთსა და არგენტინას შორის, მომავალი კვირის ბოლომდე არ იქნება მიღებული, რადგან კვლავ არსებობს გაურკვევლობა იმის შესახებ, შეძლებს თუ არა კატარი მატჩის მასპინძლობას.
ევროპის ჩემპიონ ესპანეთსა და კოპა ამერიკის მოქმედ ჩემპიონ არგენტინას შორის მატჩი 27 მარტს დოჰაში, ლუსაილის სტადიონზე, იყო დაგეგმილი.
თუმცა კატარში მატჩის ჩატარება სულ უფრო ნაკლებად სავარაუდო გახდა მას შემდეგ, რაც კატარის ფეხბურთის ასოციაციამ ყველა ტურნირი განუსაზღვრელი ვადით შეაჩერა, აშშ-ისა და ისრაელის მიერ ირანზე განხორციელებული შეტევებისა და შემდეგ არაბეთის ნახევარკუნძულის მიმართულებით გაშვებული საპასუხო რაკეტების გამო.
Reuters-ის ცნობით, კატარი აქტიურად ცდილობს მატჩი მაინც დოჰაში დარჩეს, რადგან ქვეყანამ ღონისძიების მასპინძლობაში მნიშვნელოვანი ინვესტიცია ჩადო. ნებისმიერი ცვლილება ესპანეთის ფეხბურთის ფედერაციას (RFEF), უეფას, CONMEBOL-ს, FIFA-სა და არგენტინის ფეხბურთის ასოციაციას (AFA) შორის შეთანხმებას საჭიროებს.
„მიმდინარეობს მოლაპარაკებები ადგილობრივ ორგანიზატორებთან, რომლებმაც დიდი ძალისხმევა გასწიეს იმისათვის, რომ მატჩი წარმატებით ჩატარდეს. საბოლოო გადაწყვეტილება მოსალოდნელია მომავალი კვირის ბოლოს. ამ ეტაპზე ალტერნატიული ადგილი არ განიხილება,“ - განაცხადა უეფამ.
RFEF, რომელიც აცნობიერებს, რომ მარტის სანაკრებო პაუზა მნიშვნელოვანი მოსამზადებელი ეტაპია ივნის-ივლისში ჩასატარებელი მსოფლიო ჩემპიონატის წინ, ცდილობს რაც შეიძლება მალე მიიღოს სიცხადე, რადგან მატჩამდე მხოლოდ სამი კვირა რჩება.
Reuters-ის თქმით, ლონდონი იყო ფავორიტი ქალაქი მატჩის მასპინძლობისთვის, თუმცა ესპანურმა მედიამ ასევე ვარიანტებად რომი და მილანი დაასახელა.
წინა ფინალისიმა 2022 წელს უემბლის სტადიონმა უმასპინძლა, სადაც არგენტინამ იტალია დაამარცხა. თუმცა ამჯერად უემბლიზე 27 მარტს ინგლისი ურუგვაის წინააღმდეგ თამაშობს. მიუხედავად ამისა, ლონდონში არსებობს სხვა სტადიონებიც, რომლებიც მატჩის მასპინძლობას შეძლებენ.
მიუხედავად იმისა, რომ ესპანეთს არგენტინასთან თამაში სურს, წყაროების თქმით მათი მთავარი პრიორიტეტია მსოფლიო ჩემპიონატის წინ ბოლო სანაკრებო ფანჯარა არ დაიკარგოს. ისინი ასევე განიხილავენ სხვა შესაძლო მეტოქეებს, რადგან სამი დღის შემდეგ დაგეგმილი აქვთ მატჩი ეგვიპტის წინააღმდეგ.
