UFC-ში ქალთა უმსუბუქეს (Flyweight) წონაში ახალი ჩემპიონი გამოვლინდა.
UFC 332-ის მთავარ ბრძოლაში ნატალია სილვამ ვან კონგი დაამარცხა და ვაკანტური საჩემპიონო ქამარი მოიპოვა. ყოფილმა ჩემპიონმა ვალენტინა შევჩენკომ სექტემბერში, გაუხმაურებელი ტრავმის გამო, ქამარი დათმო.
სილვამ UFC-ის ოქტაგონზე წაუგებელი სერია გააგრძელა და ვან კონგის წინააღმდეგ ხუთრაუნდიან ბრძოლაში მსაჯების გადაწყვეტილებით დამაჯერებელი გამარჯვება მოიპოვა - მსაჯთა ქულები იყო 49-46, 48-47 და 48-47.
საღამოს მეორე მთავარ ბრძოლაში მამაკაცთა სუპერმსუბუქი წონის ერთ-ერთმა ამომავალმა პრეტენდენტმა პეიტონ ტალბოტმა ამავე წონის ყოფილ ორგზის ჩემპიონ დეივესონ ფიგეირედოს ორ წუთზე ოდნავ მეტ დროში სძლია.
ტალბოტმა ფიგეირედო პირველივე რაუნდში ტექნიკური ნოკაუტით დაამარცხა.
ბრძოლის დაწყებიდან 30 წამში ტალბოტმა ფიგეირედო მარჯვენა პირდაპირი დარტყმით ნოკდაუნში ჩააგდო და ამის შემდეგ UFC-ის ყოფილი ორგზის ჩემპიონისთვის ბრძოლა სულ უფრო რთულად წარიმართა.
ტალბოტმა ზედიზედ მე-3 გამარჯვება მოიპოვა, ხოლო ყოფილი ჩემპიონის წინააღმდეგ - ზედიზედ მე-2.
ფიგეირედო პირველი ნოკდაუნის შემდეგ წამოდგა, თუმცა ბრძოლის დარჩენილ მონაკვეთში უკან იხევდა. ტალბოტმა მას თავში მუხლი მოარტყა, შემდეგ კი ბრუნში შესრულებული დარტყმით სულ მცირედით ააცილა.
ამის შემდეგ ტალბოტმა 38 წლის ბრაზილიელი კიდევ ერთი მარჯვენა პირდაპირი დარტყმით ნოკდაუნში ჩააგდო, პარტერში კი მუშტების სერია მიაყოლა. საბოლოოდ, პირველ რაუნდში, 2:09 წუთზე, მსაჯმა ჯეისონ ჰერცოგმა ბრძოლა შეწყვიტა.
