-
Aa
+
ფონტის ზომა
საღამო სავსე იყო სანახაობრივი ფინიშებითა და დამაჯერებელი გამარჯვებებით. საერთო ჯამში, 13 ბრძოლიდან 9 ნაადრევად დასრულდა, დაფიქსირდა 4 საბმიშენი, მათ შორის ერთი ძალიან იშვიათი ტექნიკით.
რაფაელ ფიზიევმა მშობლიური გულშემატკივრების წინაშე ბრწყინვალედ იასპარეზა და მანუელ ტორესი მეორე რაუნდში ტექნიკური ნოკაუტით დაამარცხა. ეს გამარჯვება მისი კარიერის ერთ-ერთ საუკეთესო მომენტად ჩაითვლება.
მეორე რაუნდის დაწყებიდან რამდენიმე წამში ფიზიევმა ტორესი სპინინგ ვილ-კიკით ძირს დასცა, შემდეგ კი შეტევა გააგრძელა და ბრძოლა 0:15-ზე დაასრულა.
ამ გამარჯვებით მან ბოლო 5 ბრძოლაში არსებული 1-4 სერია შეწყვიტა. ბრძოლის შემდეგ მან BMF-ის ტიტულზე შანსი მოითხოვა.
თანამთავარ ბრძოლაში შარა მაგომედოვმა მიშელ პერეირა მსაჯთა ერთსულოვანი გადაწყვეტილებით დაამარცხა (29-28, 29-28, 29-28).
საღამოს საუკეთესო გამოსვლისთვის განკუთვნილი $100,000-იანი ბონუსები მიიღეს: რაფაელ ფიზიევმა, ასუ ალმაბაევმა, აბდულ-რაჰმან იახიაევმა, დანიილ დონჩენკომ.
Fight of the Night ამჯერად არ დაჯილდოვდა. ამის ნაცვლად, დამატებით ხუთმა მებრძოლმა მიიღო $25,000-იანი ფინიშის ბონუსი: მატეუს კამილომ, აბუს მაგომედოვმა, ნურსულტონ რუზიბოევმა, კაან ოფლიმ და თაჰირ აბდულაევმა.
საღამოს ყველაზე გამორჩეულ მომენტებს შორის იყო ასუ ალმაბაევის Suloev Stretch ჩარლზ ჯონსონზე 0 იშვიათი და შთამბეჭდავი საბმიშენი, რომელიც UFC-ის ისტორიაში მხოლოდ მეოთხედ დაფიქსირდა.
ასევე აბდულ-რაჰმან იახიაევის ნოკაუტი 8 წამში, რომელიც საღამოს ერთ-ერთ ყველაზე დასამახსოვრებელ ეპიზოდად იქცა.
ფიზიევმა ბრძოლის შემდეგ ჩარლზ ოლივეირასთან BMF-ის ტიტულისთვის შეხვედრა მოითხოვა, თუმცა ამ ბრძოლის ორგანიზება მარტივი არ იქნება, რადგან ოლივეირას სურს ჯასტინ გეიჯის წინააღმდეგ UFC-ის ტიტულისთვის იბრძოლოს და ქამრები გააერთიანოს.
შარა მაგომედოვმა კი მოწინააღმდეგედ ისრაელ ადესანია დაასახელა. მისი აზრით, ამის მიღებაში ხელი არაფერი უნდა შეუშალოს, განსაკუთრებით იმ ფონზე, რომ ადესანიას კარიერა ბოლო პერიოდში დაღმავალ გზაზეა.

თაზო ჩარკვიანი
კომენტარები