უეფას ერთა ლიგის დასკვნითი ტურის წინ, სადაც საქართველოსა და უკრაინის ნაკრებები B ლიგაში ადგილის შესანარჩუნებლად იბრძვიან, სპორტული ანალიტიკოსები მომავალი მატჩის სცენარს აქტიურად განიხილავენ.
სტატისტიკური სურათი საკმაოდ საინტერესოა. უკრაინას ჯგუფში 4 ქულა აქვს (1 მოგება, 1 ფრე, 3 წაგება), საქართველოს კი მხოლოდ 2 ქულა (2 ფრე, 3 წაგება). ანალიტიკოსების მთავარი ყურადღება ჩვენი გუნდის შეტევის პრობლემაზე მახვილდება - საქართველოს ზედიზედ 5 ოფიციალურ შეხვედრაში გოლი არ გაუტანია. თავის მხრივ, უკრაინას დაცვაში აქვს სერიოზული ჩავარდნები (6 გაშვებული გოლი 5 მატჩში) და არასტაბილურად ასპარეზობს, თუმცა ნომინალური მასპინძლის სტატუსი და მოგებული ქულების რაოდენობა მათ გარკვეულ უპირატესობას ანიჭებს.
საქართველოს ეროვნული ნაკრების აბსოლუტური ანტირეკორდი
ტაქტიკური თვალსაზრისით, ექსპერტები ვარაუდობენ, რომ ბურთს ძირითადად უკრაინა გააკონტროლებს. საქართველოს ნაკრების მთავარი შანსი კომპაქტურ დაცვასა და სწრაფ კონტრშეტევებშია, რადგან უკრაინელებს ხშირად უჭირთ მეტოქის სწრაფ გადასვლებზე რეაგირება. განსაკუთრებული მნიშვნელობა მიენიჭება სტანდარტულ მდგომარეობებს (კუთხურები, ჯარიმები), რადგან ორივე გუნდს უჭირს პოზიციური შეტევებიდან მომენტების შექმნა.
ისტორიულადაც ამ გუნდების დაპირისპირება ყოველთვის დაძაბული და მცირეგოლიანია (ბოლო 5 წელიწადში 1 მოგება უკრაინას, 2 ფრე, მათ შორის 0:0 სექტემბერში). სწორედ ამიტომ, სპორტულ წრეებში მიიჩნევენ, რომ დიდი ალბათობით, კოშიცეშიც დაძაბულ, ერთი-ორი გოლის გარშემო აგებულ შეხვედრას (1:0, 1:1, ან 2:1) ვიხილავთ.
