უშუალო კონკურენტების ჯახი - სამგურალმა თელავს მოუგო

ეროვნული ლიგის 27-ე ტურში, სამგურალმა უშუალო კონკურენტი თელავი მინიმალური სხვაობით დაამარცხა და პლეი-აუტის ზონას, რომლის სათავეში სწორედ კახელები არიან, 4 ქულით დაშორდა.

შეხვედრის ერთადერთი გოლი მე-60 წუთზე გავიდა - ირაკლი ჯანჯღავამ მარცხენა ფლანგიდან თამაში კარგად გაამწვავა და საგოლე პასი პაბულუ რიანს გაუკეთა. 24 წლის ბრაზილიელმა მცველმა წყალტუბოელთა მაისურით ჩატარებულ მე-8 მატჩში სადებიუტო გოლი შეაგდო. იგი დილამ ივნისში დაიმატა.

რაც შეეხება ასისტის შემსრულებელ ჯანჯღავას, მისთვის მიმდინარე სეზონში მე-3 საგოლე მოქმედებაა - 2 გოლი და 1 ასისტი. 2023 წლის სეზონში, როცა ბოლნისის რიგებში, ლიგა 2-ში თამაშობდა, 30 შეხვედრაში 4 გოლი და 7 ასისტი მიითვალა.

მატჩამდე გუნდებს შორის ქულათა სხვაობა 1 იყო, ახლა კი იმერლები კახელებს 4 ქულით უსწრებენ და პლეი-აუტის ზონას შედარებით მოშორდნენ.

თელავი მომდევნო ტურში მოქმედ ჩემპიონ და ახლაც ლიდერთან მხოლოდ 3-ქულიან ჩამორჩენაში მყოფ იბერიას უმასპინძლებს, ხოლო სამგურალი ქულების აღებას ბოლოადგილოსან კოლხეთთან, ფოთში შეეცდება.