კონორ მაკგრეგორი ხუთწლიანი პაუზის შემდეგ ოქტაგონზე დასაბრუნებლად ემზადება, თუმცა PFL-ის დაუმარცხებელი ჩემპიონი, უსმან ნურმაგომედოვი მიიჩნევს, რომ გულშემატკივრებს ლოდინი კიდევ დიდხანს მოუწევთ.
ირლანდიელი ვარსკვლავის ორთაბრძოლა მაქს ჰოლოუეისთან UFC 329-ის მთავარ მოვლენად არის განსაზღვრული, სადაც ბილეთების ფასი 600 დოლარიდან იწყება და ათიათასობით დოლარს აღწევს.
მიუხედავად დიდი აჟიოტაჟისა, ნურმაგომედოვი სკეპტიკურად არის განწყობილი და ეჭვობს, რომ მაკგრეგორი საერთოდ გამოცხადდება ბრძოლაზე.
პირველ რიგში, არ მჯერა, რომ ის გამოვა და იბრძოლებს. მეორეც, რომც გამოვიდეს, არ მგონია გაიმარჯვოს, რადგან სპორტიდან ხუთი წლით ჩამოშორება ძალიან ბევრია. თუმცა, თუ ის ჰოლოუეის დაამარცხებს, ეს MMA-სთვის კარგი იქნება და სპორტს ბევრ გულშემატკივარს დაუბრუნებს.
მაკგრეგორი, რომელიც ათი წლის წინ ერთდროულად რამდენიმე წონით კატეგორიაში აქტიურად ასპარეზობდა, ბოლო პერიოდში უფრო მეტად ოქტაგონს მიღმა სკანდალური ქცევებით გახდა ცნობილი. ქომაგთა ნაწილი მიიჩნევს, რომ მძიმე ტრავმისა და ხანგრძლივი უქმობის შემდეგ ჰოლოუეისთან ბრძოლის არჩევა მხოლოდ მაკგრეგორის სტილია და მისი შესაძლო გამარჯვება სპორტის ისტორიაში ერთ-ერთი უდიდესი დაბრუნება იქნება.
