VAR-ის უხეში შეცდომა - მსაჯებმა ჰალანდის სკანდალურ გოლზე საბოლოო ვერდიქტი გამოიტანეს

პრემიერლიგის მსაჯთა კომისიამ ერლინგ ჰალანდის გოლი წესების დარღვევით გატანილად ცნო.

ორგანიზაცია Pro Ref-მა, რომელიც ინგლისში მსაჯობას კურირებს, მანჩესტერ იუნაიტედის კარში ერლინგ ჰალანდის გოლის ჩათვლის გადაწყვეტილება შეცდომად აღიარა.

ნორვეგიელის ზუსტმა დარტყმამ მანჩესტერ სიტის დერბიში გამარჯვება მოუტანა (1:0). მთავარმა არბიტრმა, მაიკლ ოლივერმა თავდაპირველად გოლი თამაშგარე მდგომარეობის გამო გააუქმა, თუმცა ვიდეოასისტენტის გავლენით გადაწყვეტილება შეცვალა.

„კვირას, ოლდ ტრაფორდზე გამართული პრემიერ ლიგის მატჩის 60-ე წუთზე მომხდარ ინციდენტთან დაკავშირებით, წარმოგიდგენთ განმარტებას ერლინგ ჰალანდის ჩათვლილ გოლზე.

მინდვრის მსაჯის გადაწყვეტილება იყო თამაშგარე მდგომარეობის დაფიქსირება. იგი VAR-ის მეშვეობით გადამოწმდა და დადგინდა, რომ ჰალანდი ოფსაიდში არ იმყოფებოდა.

იმავე შეტევისას დადგინდა, რომ ენცო ფერნანდესი ბურთს არ შეხებია, რაც ნიშნავს, რომ ოფსაიდის წესის ნებისმიერი დარღვევა მოცემულ შემთხვევაში სუბიექტურ ხასიათს ატარებს. თუმცა, ამ შემთხვევაში VAR-მა არ გაითვალისწინა მისი პოზიციის სავარაუდო გავლენა და ვალდებული იყო, ეპიზოდის განხილვა მინდვრის მსაჯისთვის ეკრანთან ერჩია.

დღეს საღამოს დავუკავშირდით მანჩესტერ იუნაიტედს, რათა ვაღიაროთ ის, რაც მსაჯის შეცდომად მიგვაჩნია. აღნიშნული ინციდენტის ანალიზი ჩატარდება“, - ნათქვამია Pro Ref-ის განცხადებაში, რომელსაც ჟურნალისტი ბენ ჯეიკობსი ავრცელებს.