ვარდის დაბრუნება და ლესტერმა ქულა მოიპოვა

პრემიერ ლიგის პირველი ტურის ბოლო მატჩში უმაღლეს დივიზიონში ახლად დაბრუნებულმა ლესტერმა ტოტენჰემს უმასპინძლა.

შეხვედრაში ანგარიში 29-ე წუთზე პედრო პორომ გახსნა, საგოლე გადაცემა კი ლესტერის ყოფილმა მოთამაშემ ჯეიმს მედისონმა მიითვალა. ტოტენჰემმა პირველი ტაიმი მოიგო, თუმცა ლონდონელებმა უპირატესობის შენარჩუნება ვერ შეძლეს.

58-ე წუთზე ისაჰაკუ ფატავუს ჩაწოდებულს ჯეიმი ვარდი გამოეხმაურა, რომელიც უმეთვალყურეოდ იყო დარჩენილი. ინგლისელმა თავდამსხმელმა თავური დარტყმით ტოტენჰემის კარი აიღო და ანგარიში გაათანაბრა.

37 წლის ვარდი კვლავ მოწოდების სიმაღლეზეა და ერთ დროს პრემიერ ლიგის ბომბარდირი კვლავ ამწუხრებს ინგლისის დიდი ექვსის წევრებს.

საბოლოოდ ვარდის გოლი ლესტერისთვის ქულის მომტანი აღმოჩნდა.

მატჩის დროს მძიმე ტრავმა მიიღო როდრიგო ბენტანკურმა, რომელიც მეტოქესთან შეჯახების შემდეგ მოედანზე მოწყვეტით დაეცა. ურუგვაელ მოთამაშეს კისერი დაუფიქსირეს და საკაცით გაიყვანეს. ჯერ-ჯერობით უცნობია მისი დაზიანების სიმძიმე.