ვეტერანი ფეხბურთელი ჯაბა დვალი გარდაიცვალა

ვეტერანი ქართველი ფეხბურთელი ჯაბა დვალი 41 წლის ასაკში გარდაიცვალა - მიზეზად გულის პრობლემები სახელდება.

,,უდიდესი გულისტკივილით უნდა გაცნობოთ, რომ გარდაიცვალა წარსულში ჩვენი კლუბის ლეგენდარული ფეხბურთელი და ეროვნული ნაკრების წევრი, საფეხბურთო კლუბ "ზესტაფონის" გენერალური დირექტორი ჯაბა დვალი..." - წერს ზესტაფონის გვერდი.

ჯაბა დვალის კარიერის გამორჩეული წლები სწორედ ზესტაფონს უკავშირდება, სადაც 2009-2012 წლებში ასპარეზობდა და ნიკოლოზ გელაშვილთან ერთად ბრწყინვალე დუეტს ქმნიდა.

დვალი იმერულ გუნდთან ერთად საქართველოს ჩემპიონი 2-ჯერ, თასისა და სუპერ თასის გამარჯვებული კი თითოჯერ გახდა.

დვალს დინამო თბილისშიც უთამაშია, სადაც 2004-2007 და 2012-2014 წლებში გამოდიოდა და დედაქალაქურ გუნდთან ერთადაც საქართველოს 2-გზის ჩემპიონი და თასის მფლობელია.

ჯაბა საქართველოს ჩემპიონატის ბომბარდირი 2-ჯერ გახდა: 2005-06 წლებში - 21 გოლით, 2011-12 წლებში კი - 20 გოლით.

2-ჯერ კარიერა უცხოეთშიც გააგრძელა და კიშინოვის დაჩიაში ასპარეზობდა (2007-2009, 2014-2016).

ჯაბა დვალს საქართველოს ნაკრებში 1 მატჩი აქვს ჩატარებული, 2012 წლის 14 ნოემბერს, ეგვიპტესთან ამხანაგურ მატჩში მოედანზე 45 წუთი გაატარა.