VIDEO: 0:15 ჩამორჩენა და სოლიდური პერფორმანსი - ოკლაჰომამ მოედნის უპირატესობა დაიბრუნა
23 მაი, 2026 · 0 წთ წასაკითხად
-
Aa
+
ფონტის ზომა
NBA-ის დასავლეთ კონფერენციის ფინალურ სერიაში, მოქმედმა ჩემპიონმა ოკლაჰომა სიტი თანდერმა სან ანტონიო სპერსი სტუმრად დაამარცხა და მოედნის უპირატესობა დაიბრუნა - 2:1.
შეხვედრა ტექსასელთა დიდი უპირატესობით დაიწყო და ისინი საწყის წუთებში 15:0 დაწინაურდნენ - მას შემდეგ, რაც NBA-ში სტატისტიკურ მონაცემებს დეტალურად აითვლიან (ანუ 1996-97 წლების სეზონიდან), ეს ყველაზე დიდი გახსნითი მშრალი უპირატესობაა.
თანდერმა თამაში ნელ-ნელა დაალაგა, პირველი მეოთხედი 5-ქულიანი ჩამორჩენით დაასრულა, დანარჩენ სამივე მეოთხედში კი თავად დომინირებდა და საქმის გამარჯვებამდე მიყვანა აღარ გასჭირვებია - 123:108.
"ცხადია, გვებრძოდნენ და ამაში აღფრთოვანებული გულშემატკივარიც ეხმარებოდათ. თამაშის დასაწყისში ჩვენი მაქსიმუმი არ გაგვიკეთებია, მაგრამ ასეთი რაღაცებიც ხდება. ყველაფერი უკან დარჩა. ასეთ სიტუაციაში, რაც შეგიძლია გააკეთო, შეტევაზე ფოკუსირება და პასუხის გაცემაა, ჩვენც ეს გავაკეთეთ", - აღნიშნა მატჩის შემდეგ გილჯეს-ალექსანდერმა.
სან ანტონიოელთა მხარეს, საუკეთესო ვიქტორ ვემბანიამა იყო - 26 ქულა, 4 მოხსნა, 3 ასისტი; დეივინ ვასელმა გუნდს 20 ქულა, 7 მოხსნა, 2 ასისტი შესძინა; დე'აარონ ფოქსმა 15 ქულა, 7 მოხსნა, 6 ასისტი მიითვალა; ხოლო სტეფონ ქასლის აქტივში 14 ქულა, 5 მოხსნა, 7 ასისტი გახლდათ.
"ეს ჩემი პირველი პლეი-ოფია, როგორც ბევრი ჩემი თანაგუნდელისთვის. რა თქმა უნდა, რთული გამოცდები გველოდა. მოსალოდნელიც იყო, რომ შეიძლებოდა ასეც მომხდარიყო, მაგრამ ახლა ვნახოთ ჩვენი რეაქცია, რისგან შევდგებით", - ეს უკვე ვემბანიამას მატჩისშემდგომი შეფასებაა.
OKC-მა, სერიის საწყისი შეხვედრის შინ მარცხის შემდეგ, მოედნის უპირატესობა დაიბრუნა, მომდევნო თამაშს ისევ სან ანტონიოში ჩაატარებს (25 მაისის 04:00 საათზე), რის შემდეგაც სპერსს საკუთარ Paycom Center-ში მიიღებს - 27 მაისის 04:30 საათზე.
