VIDEO: 3-დან 3 - ლეიკერსის ქამბექი და დონჩიჩის ისტორიული მატჩი იუტასთან

ლუკა დონჩიჩმა ლოს ანჯელეს ლეიკერსის 2026/27 წლების სეზონი შთამბეჭდავად დაიწყო.

სლოვენიელმა სუპერვარსკვლავმა კიდევ ერთი გამორჩეული მატჩი ჩაატარა და 38 წუთში 52 ქულა, 10 შედეგიანი გადაცემა, 8 მოხსნა და 2 ჩაჭრა მიითვალა.

დონჩიჩმა 30-დან 17 სროლა გამოიყენა და ლეიკერსს იუტა ჯაზთან 132:123 გამარჯვებაში დაეხმარა.

დონჩიჩი უბრალოდ შეუჩერებელია, ის მიმდინარე NBA-ის სეზონში პირველი კალათბურთელი გახდა, რომელმაც ერთ მატჩში 50 ან მეტი ქულა ჩააგდო.

მისი ფანტასტიკური თამაშის წყალობით ლეიკერსმა 18-ქულიანი ჩამორჩენა აღმოფხვრა და შეხვედრაში გამარჯვება მოიპოვა.

იუტა ჯაზის წინააღმდეგ 40-ქულიანი ზღვრის გადალახვის შემდეგ ლუკა დონჩიჩმა ლოს ანჯელეს ლეიკერსის ისტორიაში მნიშვნელოვანი მიღწევით ლებრონ ჯეიმსსაც გადაასწრო.

სლოვენიელმა თავის ყოფილ ვარსკვლავ თანაგუნდელს გადაასწრო და კლუბის ისტორიაში 40 ან მეტი ქულით ჩატარებული მატჩების რაოდენობით ყველა დროის რეიტინგში მე-6 ადგილზე გადაინაცვლა.

კიდევ უფრო შთამბეჭდავია ის ფაქტი, რომ დონჩიჩს ლეიკერსის მაისურით 3000 ქულის მოსაგროვებლად მხოლოდ 95 მატჩი დასჭირდა.

ჯორჯ მაიკანს, რომელიც ამ მაჩვენებლით დონჩიჩს ჩამორჩება, 3000-ქულიანი ნიშნულის მისაღწევად 106 შეხვედრა დასჭირდა, ხოლო ლებრონ ჯეიმსს - 114 მატჩი.

იუტასთან 21 წუთი ითამაშა სანდრო მამუკელაშვილმა, რომელმაც 9 ქულა და 3 მოხსნა მიითვალა.

ლეიკერსმა სეზონი იდეალურად დაიწყო და სამიდან სამივე შეხვედრა მოიგო. ახლა დონჩიჩი და მისი თანაგუნდელები ლოს ანჯელესში დაბრუნდებიან, სადაც პორტლენდ ტრეილ ბლეიზერსს დაუპირისპირდებიან.