ვიდეო: ბითაძე დაბრუნდა - ორლანდომ ოვერტაიმში წააგო

NBA-ს რეგულარული სეზონის მატჩში ორლანდო მეჯიქი მაიამი ჰიტს დაუპირისპირდა. 6 მატჩის გამოტოვების შემდეგ გუნდს დაუბრუნდა გოგა ბითაძე, რომელსაც ტვინის შერყევა ჰქონდა.

თამაშის ძირითადი დრო 108-108 დასრულდა, გამარჯვებულის გამოსავლენად კი 2 ოვერტაიმი გახდა საჭირო. საბოლოოდ შეხვედრა მაიამის გამარჯვებით 125-119 დასრულდა.

გამარჯვებულ გუნდს ტაილერ ჰირომ (30 ქულა, 8 მოხსნა, 12 შედეგიანი გადაცემა) და ბემ ადებაიომ (26 ქულა, 10 მოხსნა, 9 შედეგიანი გადაცემა) ულიდერეს. ორლანდოს მხრიდან კი საუკეთესო ფრანც ვაგნერი იყო 29 ქულითა და 8 მოხსნით.

რაც შეეხება ბითაძეს, ქართველმა პარკეტზე 22 წუთი გაატარა, რა დროშიც 10 ქულასთან ერთად 9 მოხსნაც მიითვალა და ორმაგ დუბლამდე მხოლოდ 1 მოხსნა დააკლდა.

45 მატჩში 23 მოგებით მაიამი ჰიტი აღმოსავლეთ კონფერენციაში მე-6 ადგილზეა, მეჯიქი კი ბოლოდროინდელი წაგებების შემდეგ 48 შეხვედრაში 24 მოგებით მე-7 ადგილამდე დაქვეითდა.