VIDEO: გუნდში მე-2 შედეგი - მამუს კლიპერსთან მცირე დროში კარგი სტატისტიკა ჰქონდა

სანდრო მამუკელაშვილის ტორონტო რეპტორსმა ბოლო 4-დან მე-3 შეხვედრა წააგო - ამჯერად ლოს ანჯელესში, იქაური კლიპერსის წინააღმდეგ დამარცხდა (94:119).

კალიფორნიელებს კავაი ლეონარდმა (27 ქულა), დარიუს გერლენდმა (24 ქულა) და ბენედიქტ მატურინმა (23 ქულა) ულიდერეს, კანადელთა მხარეს კი ერთ-ერთი გამორჩეული მამუკელაშვილი იყო.

ბრენდონ ინგრემმა 18 ქულა მიითვალა, მის შემდეგ კი ქულებით საუკეთესო სწორედ მამუ იყო, თანაც პარკეტზე 15:08 წუთი გაატარა - 2-დან 2 ორქულიანი და 5-დან 3 სამქულიანი ჩააგდო, 1 საჯარიმო კი ვერ გამოიყენა. შედეგად, 7 მოხსნასთან ერთად, 13 ქულა ჩაიწერა აქტივში.

შეგახსენებთ, წინა მატჩში ქართველს კარიერის მე-4 ყველაზე შედეგიანი თამაში ჰქონდა, როცა იუტა ჯაზს 23 ქულა ჩაუგდო. 

რეპტორსს კვლავ 40 მოგება აქვს, აღმოსავლეთ კონფერენციის მე-6 ადგილზეა და პლეი-ოფის პირდაპირ 1/8 ფინალის საგზურის მომტანი პოზიციის დაკარგვის ზღვარზეა.

დარკო რაიაკოვიჩის გუნდი, 28 მარტის 04:30 საათზე, დასავლეთ კონფერენციის მე-11 ადგილოსან ნიუ ორლეანს პელიკანსს (25 მოგება, 48 წაგება) სტუმრად შეხვდება.