VIDEO: გუნდში მე-3 შედეგიანი - მამუს გამარჯვება და კარგი მატჩი მილუოკისთან

სანდრო მამუკელაშვილის ტორონტო რეპტორსმა, NBA-ის რეგულარულის მე-8 შეხვედრაში, მილუოკი ბაქსი 28-ქულიანი სხვაობით დაამარცხა და ზედიზედ მე-3 გამარჯვება იზეიმა - 128:100. ქართველი მოთამაშე თავის გუნდში შედეგიანობით მე-3 იყო.

მამუმ პარკეტზე 23:28 წუთი გაატარა და ტორონტოელებს 15 ქულა, 7 მოხსნა და 1 ასისტი შესძინა. მიმდინარე რეგულარულში ამაზე შედეგიანი თამაში ერთხელ ჰქონდა - 27 ოქტომბერს, დალასთან 16 ქულა, 1 მოხსნა და 3 ასისტი მიითვალა.

კანადელთა მხრიდან, სანდროზე უფრო შედეგიანი ორი კალათბურთელი იყო - სკოტ ბარნსი (23 ქულა, 3 მოხსნა და 6 ასისტი) და არჯეი ბარეტი (23 ქულა, 8 მოხსნა და 4 ასისტი),

რეპტორსმა ზედიზედ მე-3 თამაშის მოგებით, სეზონში 4 გამარჯვება მოაგროვა და აღმოსავლეთ კონფერენციის საპლეიოფო, მე-8 ადგილზე აინაცვლა.

სანდროს გუნდი 5-მატჩიან გასვლით ტურნეს ატლანტადან იწყებს - 8 ნოემბრის 04:30 საათიდან ჰოუქსს ხვდებიან, რის შემდეგაც ფილადელფიაში, ბრუკლინში, კლივლენდსა და ინდიანაში ითამაშებენ.