VIDEO: ლებრონს სამმაგამდე ცოტა დააკლდა - ლეიკერსმა ჰიუსტონთან ანგარიში გახსნა

NBA-ის პლეიოფის პირველი მატჩი შედგა ლოს ანჯელეს ლეიკერსსა და ჰიუსტონ როკეტსს შორის, რომელიც ლეიკერსის გამარჯვებით 107-98 დასრულდა.

მნიშვნელოვანი დანაკლისი ჰქონდა ორივე გუნდს. ლეიკერსს ლუკა დონჩიჩი და ოსტინ რივზი ვერ ეხმარებოდნენ, ჰიუსტონს კი კევინ დურანტი გამოაკლდა.

გამარჯვებულ გუნდს ლუკ კენარდმა ულიდერა, რომელმაც 27 ქულა მიითვალა, ასევე გამოსარჩევი იყო დეანდრე აიტონისა და ლებრონ ჯეიმსის სტატისტიკაც, რომელთაც ორმაგი დუბლები შეასრულეს.

აიტონმა 19 ქულა და 11 მოხსნა დააგროვა, 41 წლის ჯეიმსმა კი - 19 ქულა და 13 შედეგიანი გადაცემა, სამმაგ დუბლამდე კი ლებრონს 2 მოხსნა დააკლდა.

დურანტის არყოფნაში ჰიუსტონს ქულებში ალფერენ შენგუნმა ულიდერა, რომელმაც ასევე 19 ქულა ჩაიწერა აქტივში.

ლოს ანჯელეს ლეიკერსმა სერიაში ანგარიში გახსნა, გუნდებს შორის მეორე შეხვედრა 22 აპრილს გაიმართება.