VIDEO: მე-10 საგოლე მოქმედება სეზონში - აშორტიამ ისევ გაიტანა

ბუნიოდქორის შემტევმა, იმედა აშორტიამ უზბეკეთის სუპერ ლიგის მიმდინარე სეზონში მე-10 საგოლე მოქმედება მიითვალა. ქართველმა ფეხბურთელმა დინამო სამარყანდთან შეხვედრაში გაიტანა.

აშორტიას გუნდისთვის, დინამო მე-4 ადგილისთვის ბრძოლაში მთავარი კონკურენტი იყო და თუ დღეს საშინაო მატჩში მოუგებდა, მასთან სხვაობას 1 ქულამდე შეამცირებდა.

მასპინძლები 42-ე წუთზე სწორედ ქართველმა შემტევმა დააწინაურა - ბურთი ფლანგზე მიიღო, სივრცე აითვისა და მახვილი კუთხიდან შეაგდო. თუმცა, მეორე ნახევარში ბუნიოდქორმა 3 გოლი გაუშვა და ამ სეზონში ოთხეულში მოხვედრის შანსი დაკარგა.

29 წლის აშორტიამ სუპერ ლიგის წლევანდელ 28 ტურში მე-8 გოლი გაიტანა და 2 საგოლე გადაცემა აქვს. იგი თავისი გუნდის საუკეთესო თანაბომბარდირია.

ბუნიოდქორს 46 ქულა აქვს, ცხრილის მე-5 ადგილზე იმყოფება და უახლოეს მდევარ ოკმკ-ს 2 ქულით უსწრებს. გუნდი მომდევნო ტურში, 21 ნოემბერს, სოგდიანას სტუმრად შეხვდება.