VIDEO: მცველი ჩამოიტოვა და მაღალ კუთხეში შეაგდო - ზურიკოს მორიგი გოლი ლიგა 2-ში

საფრანგეთის ლიგა 2-ის მე-12 ტურში, ზურიკო დავითაშვილმა პაუსთან შეხვედრაში შეცვლაზე ითამაშა და გოლი გაიტანა. მისმა გუნდმა ერთ-ერთ უშუალო კონკურენტთან და ამ ტურამდე მე-3 ადგილოსან გუნდთან 6:0 მოიგო.

სენტ-ეტიენის ქართველი შემტევი თამაშში 67-ე წუთზე ჩაერთო, როცა ანგარიში 5:0 იყო, 79-ე წუთზე კი მატჩში ბოლო გოლი გაიტანა. მისთვის მიმდინარე სეზონში მე-5 გოლია.

ზურიკო, რომელმაც 4 ოქტომბრის შემდეგ პირველად გაიტანა, ლიგა 2-ის ბომბარდირთა დავაში მე-3 ადგილზეა და ლიდერ ტავფიკ ბენტაიებს 3 გოლით ჩამორჩება.

12 ტურის შემდეგ, სენტ-ეტიენმა 23 ქულა მოაგროვა და რედ სტართან მეორე-მესამე ადგილებს იყოფს - ლიდერ ტრუას 27 ქულა აქვს. მწვანეები მომდევნო ტურში სწორედ უშუალო კონკურენტ რედ სტარს ხვდებიან - გასვლითი მატჩია და 1-ელ ნოემბერს ჩატარდება.