სლოვაკეთის NIKE LIGA-ს საჩემპიონო ჯგუფის მე-7 ტურში, დუნაისკა სტრედამ სანდრო ნარიმანიძის ჟილინა ქართველების ასისტებით დაამარცხა - 3:1.
გიორგი გაგუა სტრედას ძირითადში იყო და 36-ე წუთზე, ლამაზი გარღვევის შემდეგ, თანაგუნდელს საგოლედ ჩაუწოდა, ხოლო ცოტნე კაპანაძე მოედანზე 59-ე წუთზე შევიდა და 7 წუთში მანაც საგოლე პასი შეასრულა.
შემტევ გაგუას მიმდინარე სეზონის 23 მატჩში 1 გოლი და 3 ასისტი აქვს, მცველმა კაპანაძემ კი 26-ე შეხვედრაში მე-3 საგოლე გადაცემა ჩაიწერა აქტივში.
რაც შეეხება ჟილინას ცენტრალურ მცველ ნარიმანიძეს, ტრადიციულად, ძირითად შემადგენლობაში იყო და მოედანზე 90 წუთი გაატარა.
ამ გამარჯვების შემდეგ, დუნაისკა სტრედამ 55 ქულა მოაგროვა, ევროპა ლიგაზე გამსვლელი მე-2 ადგილი გაიმყარა და ლიდერ სლოვან ბრატისლავას 4 ქულამდე მიუახლოვდა, ჟილინა კი მე-4 პოზიციაზეა და კონფერენს ლიგის ზონაში მოსახვედრად ბრძოლას აგრძელებს.
სლოვაკეთის ჩემპიონატში დღეს ქართველების კიდევ ერთი დაპირისპირებაა, რომლითაც ტური სრულდება - ლუკა ხორხელისა და გიორგი მოისწრაფიშვილის სპარტაკ ტრნავა გურამ კაშიას სლოვან ბრატისლავას მასპინძლობს.
მომდევნო ტურში, 2 მაისს, დუნაისკა სტრედა სწორედ სლოვან ბრატისლავას ესტუმრება და საჩემპიონო შანსების შენარჩუნებას შეეცდება. აღნიშნული მატჩის ჩათვლით, სათამაშო 3 ტური რჩება.
