მატჩში ანგარიში 52-ე წუთზე ხორხე ალასტუეიმ გახსნა, რომელმაც შორეული დარტყმით რეალ სოლტ ლეიკის მეკარეს, რაფაელ კაბრალს აჯობა.
3 წუთის შემდეგ, 55-ე წუთზე, საბა ლობჟანიძემ ეფექტური, მოჭრილი დარტყმით ბურთი კარის კუთხეში მოათავსა და ანგარიში გაათანაბრა - 1:1.
61-ე წუთზე კი მორგან გილავოგიმ გამარჯვების გოლი გაიტანა. სერჟი სოლანსმა შესანიშნავი ინდივიდუალური მოქმედების შემდეგ მეტოქის დაცვის ხაზი გაარღვია და ხელსაყრელ პოზიციაში მყოფ გილავოგის დროული გადაცემა გაუკეთა, რომელმაც თავისი გუნდი წინ გაიყვანა და საბოლოო ანგარიში - 2:1 დააფიქსირა.
სოლტ ლეიკი დასავლეთ კონფერენციაში 42 ქულით მე-9 ადგილზეა და პლეიოფის ზონის ბოლო ადგილს იკავებს.
რაც შეეხება საბა ლობჟანიძეს, MLS-ის მიმდინარე სეზონში ქართველის ანგარიშზე 6 გოლი და 4 საგოლე გადაცემაა.
