იტალიის საკალათბურთო ჩემპიონატის მეოთხედფინალური სერია საკმაოდ დაძაბული გამოდგა ვირტუს ბოლონიასა და რეიერ ვენეციას შორის.
ვირტუსი სერიას 2-0 იგებდა, თუმცა საბოლოოდ ტურნირიდან გამოთიშვასთან ახლოს იყო. ბოლონიელებმა ორივე გასვლითი მატჩი დათმეს და დუშკო ივანოვიჩის გუნდი მე-5 მატჩში, როცა თამაშის დასრულებამდე 5 წუთი იყო დარჩენილი, 9 ქულით აგებდა.
აქ კი სცენაზე თორნიკე შენგელია გამოჩნდა, რომელმაც წინა მატჩი თავის ტრავმის გამო გამოტოვა და ამ შეხვედრაშიც არ უნდა ეთამაშა, რადგან ის ბოლო მომენტამდე სკამზე იჯდა.
33 წლის ქართველმა პარკეტზე მხოლოდ 3 წუთი გაატარა და ბოლონიას გამარჯვებაში გადამწყვეტი როლი ითამაშა.
შენგელიამ 7 ქულა ჩააგდო (1/1 ორქულიანი, 5/5 საჯარიმო), მოედანზე ყოფნისას კი მისი პლუს-მინუს მაჩვენებელი +11 იყო, მან ფაქტობრივად მარტომ მოატრიალა მატჩი და თამაშის დასრულებამდე 47 წამით ადრე სერიის მომგები ბურთი ჩააგდო.
ვირტუს ბოლონია პლეიოფის მომდევნო ეტაპზე ოლიმპია მილანოს შეხვდება.
