VIDEO: სპერსი თამაშშია - ვემბიმ ნიუ იორკს 13-მატჩიანი მოგებათა სერია შეაწყვეტინა
09 ივნ, 2026 · 0 წთ წასაკითხად
-
Aa
+
ფონტის ზომა
NBA-ის 2025-26 წლების სეზონის ფინალური სერიის მე-3 მატჩში, სან ანტონიო სპერსმა ნიუ იორკ ნიქსს სტუმრად მოუგო და სხვაობა შეამცირა - 1:2.
საწყისი ორივე საშინაო მატჩის წაგების შემდეგ, მიტჩ ჯონსონის გუნდმა მედისონ სქუეარ გარდენში პირველი მეოთხედი 11 ქულით მოიგო, თუმცა მეორეში 18-ქულიანი სხვაობით დამარცხდა და დიდ შესვენებაზე ნიქსი 7-ქულიანი უპირატესობით გავიდა.
მესამე პერიოდის საწყისი ნახევარი ტექსასელებმა ბევრად უკეთესად ითამაშეს, ლიდერობა მოიპოვეს და ხელიდან საფინალო სირენამდე აღარ გაუშვიათ - 115:111.
ნიუ იორკ ნიქსმა 23 აპრილისა და 13 მატჩის შემდეგ პირველად წააგო, რაც NBA-ის ერთი სეზონის პლეი-ოფში ისტორიულად მე-2 შედეგია - გოლდენ სტეიტ უორიორსმა 2017-ში მიჯრით 15 გამარჯვება იზეიმა.
ცხადია, მთავარი როლი ჰქონდა ვიქტორ ვემბანიამას, რომელმაც 32 ქულა, 8 მოხსნა, 6 ასისტი, 2 ჩაჭრა, 3 დაფარება მიითვალა; მაგარი მატჩი ჩაატარა და მნიშვნელოვანი ბურთები ჩააგდო სტეფონ ქასლმა - 23 ქულა, 5 მოხსნა, 5 ასისტი; დილენ ჰარპერს ორმაგ დუბლამდე ცოტა დააკლდა - 13 ქულა, 9 მოხსნა, 4 ასისტი; ჟულიან შამპენმა და დე'აარონ ფოქსმა (3 მოხსნა, 8 ასისტიც) 12-12 ქულა ჩაიწერეს აქტივში; ხოლო დეივინ ვასელს 11 ქულა ჰქონდა.
რაც შეეხებათ მასპინძლებს, ჯეილენ ბრანსონმა 32 ქულა, 5 მოხსნა, 5 ასისტი მიითვალა, თუმცა რამდენიმე მომენტში მნიშვნელოვანი დაკარგვაც ჰქონდა (ჯამში 5), მესამე მეოთხედის შუიდან კი 4 ჯარიმით თამაშობდა... გამორჩეულად კარგი ოგუგუა ანუნობი გახლდათ - 28 ქულა, 5 მოხსნა, 1 ასისტი; ჯოშ ჰარტმა გუნდს 16 ქულა, 9 მოხსნა, 5 ასისტი შესძინა; ხოლო კარლ-ენტონი თაუნსმა - 11 ქულა, 8 მოხსნა, 1 მოხსნა, 3 ჩაჭრა, 2 დაფარება.
შედეგად, სან ანტონიო თამაშში დაბრუნდა, სერიაში სხვაობა მინიმუმამდე შეამცირა, თუმცა მოედნის უპირატესობის დასაბრუნებლად, კიდევ ერთი გასვლითი გამარჯვება სჭირდება.
გუნდები შემდეგ მატჩს ისევ მედისონ სქუეარ გარდენში, 11 ივნისის 04:30 საათიდან გამართავენ, რის შემდეგაც მე-5 თამაში ფროსტ ბანკ სენთერში ჩატარდება - 14 ივნისის 04:30 საათზე.
