VIDEO: სულ ცოტა MVP-ს სტატუსამდე - შერმადინის მაგარი მატჩი და გამარჯვება სარაგოსასთან

გიორგი შერმადინმა, ესპანეთია ლიგა ენდესას 24-ე ტურში, სოლიდური მატჩი ჩაატარა. მისმა ლაგუნა ტენერიფემ სარაგოსა 23-ქულიანი სხვაობით დაამარცხა - 99:76.

ქართველი ცენტრი, რომელსაც 3 კვირის წინ მამა გარდაეცვალა, სასტარტოში არ ყოფილა, თუმცა პარკეტზე 16:15 წუთი გაატარა და მთლიანად შეხვედრაში ერთ-ერთი საუკეთესო იყო - 15 ქულა, 3 მოხსნა, 1 ასისტი. 7-დან 5 ორქულიანი და 5-დან 5 საჯარიმო ჩააგდო.

შერმოს ეფექტიანობის ინდექსმა 22 შეადგინა, რაც მატჩის MVP მარსელინიო უერტასის მაჩვენებელზე მხოლოდ 1-ით ნაკლები გახლდათ.

კანარიულმა კლუბმა ბოლო 5-დან მე-4 ტურში გაიმარჯვა, 15 მოგება მოაგროვა და საპლეიოფო 8 გუნდში პოზიცია შედარებით გაიმყარა - მე-9 ადგილოსან ბილბაოსთან უპირატესობა 1 მოგებაა, მეორე მხრივ, ზედა ოთხეულთანაც 1-მოგებიანი ჩამორჩენაა.

ლაგუნა ტენერიფე მომდევნო ტურში, 5 აპრილს, მე-13 ადგილოსან ფორსა ლეიდას (8 მოგება, 16 წაგება) სტუმრად შეხვდება.