VIDEO: მამუს სოლიდური მატჩი - ტორონტომ გოგას ორლანდო გაანადგურა და რეკორდიც დაამყარა

NBA-ში კიდევ ერთი ქართული დაპირისპირება შედგა - სანდრო მამუკელაშვილის ტორონტო რეპტორსმა გოგა ბითაძის ორლანდო მეჯიქს უდიდესი სხვაობით (139:87) აჯობა.

გოგამ 10:11 წუთში 6 ქულა, 4 მოხსნა მიითვალა, ხოლო სანდრო მატჩის ერთ-ერთი ყველაზე შედეგიანი და სასარგებლო მოთამაშე გახლდათ - ქულების მხრივ, მხოლოდ არ ჯეი ბერეტსა (24 ქულა) და სკოტი ბერნსს ჩამორჩა. ბერნსს სოლიდური ორმაგი დუბლი ჰქონდა - 23 ქულა, 5 მოხსნა, 15 ასისტი.

მამუმ პარკეტზე 21:19 წუთი გაატარა - 9-დან 6 ორქულიანი, 4-დან 2 სამქულიანი და 1-დან 1 საჯარიმო ჩააგდო. შედეგად, 19 ქულასთან ერთად, 4 მოხსნა და 3 ჩაჭრაც ჰქონდა.

აღსანიშნავია, რომ მისი მოედანზე ყოფნისას რეპტორსმა 47-ქულიანი უპირატესობა მიიღო, რაც ორივე გუნდში საუკეთესო მაჩვენებელია. მე-2 შედეგის მქონე ჯამალ შიდის რიცხვი 34-ია.

მამუკელაშვილი ბოლო დროს კარგ ფორმაში და შედეგიანია - ნიუ ორლეანს პელიკანსთან 18 ქულა, 9 მოხსნა, 2 ასისტი მიითვალა, კლიპერსთან 13 ქულა, 7 მოხსნა მიითვალა, ხოლო იქამდე იუტასთან კარიერის მე-4 ყველაზე შედეგიანი შეხვედრა ჩაატარა (23 ქულა, 4 მოხსნა, 2 ასისტი).

ასევე, ტორონტომ NBA-ის რეკორდი დაამყარა - 1997-98 წლების შემდეგ (რაც მსგავს სტატისტიკებს აითვლიან), არავის ჰქონია იმაზე დიდი "გაქცევა" ვიდრე კანადელებს მეჯიქთან - ზედიზედ 31 ქულა ჩააგდეს (31:0).

რეპტორსმა ბოლო 4-დან მე-3 მატჩი მოიგო, 42 გამარჯვება მოაგროვა და აღმოსავლეთ კონფერენციის მე-5 ადგილი შეინარჩუნა. მომდევნო თამაში, 1-ელი აპრილის 04:00 საათზე, თავიანთივე კონფერენციის ლიდერ დეტროიტ პისტონსთან სტუმრად აქვთ.