VIDEO: უმნიშვნელოვანესი შედეგი საჩემპიონო რბოლაში - რა მოხდა ქართულ კლასიკოში?
24 წთ წინ · 0 წთ წასაკითხად
-
Aa
+
ფონტის ზომა
ეროვნული ლიგის 33-ე ტურში ქართული კლასიკო შედგა - დინამო თბილისმა ტორპედო ქუთაისთან უმნიშვნელოვანესი ქულები დაკარგა.
იმერლებმა მე-8 წუთზე სწრაფი გოლი გაიტანეს, როცა დინო სლორუპმა შორიდან დაარტყა, დინამოელთა მეკარემ კი რეაგირება დააგვიანა - 0:1.
ტოტალური უპირატესობის მიუხედავად, თბილისელებმა დარჩენილ 82 წუთში მხოლოდ ჰალიდ დოლტმურზიევის გოლით იხეირეს. ნიკა ნინუამ პენალტი გააფუჭა, რასაც კიდევ არაერთ ეპიზოდში ვერგამოყენებული შანსი დაემატა.
დინამომ მეტოქის კარისკენ 26-ჯერ დაარტყა (8-ჯერ ზუსტად) და 11 კუთხური მოაწოდა, ტორპედომ 5-ჯერ დაარტყა (ერთხელ ზუსტად) და 1 კუთხური ჰქონდა, ოთო გოშაძემ 7 სეივი შეასრულა და მატჩის მთავარი გმირი გახდა.
ცუდი სეზონის მიუხედავად, ტორპედო 2026 წელს ისე დაასრულებს, რომ დინამოსთან არც ერთი ურთიერთშეხვედრა ექნება წაგებული - 1 მოგება, 3 ფრე.
აღნიშნული შედეგის გათვალისწინებით, საჩემპიონო რბოლაში იბერია 1999-მა და დინამო ბათუმმა მნიშვნელოვანი უპირატესობა მიიღეს, დინამო თბილისმა კი მათი გადასწრების შანსი გაუშვა ხელიდან.
ამ მომენტისთვის ყველაზე კარგ პოზიციაში დინამო ბათუმია, რომელიც თუკი ამ ტურში რუსთავს საშინაო მატჩს მოუგებს, გალიდერდება და დარჩენილ 3 ტურში მხოლოდ საკუთარ თავსა და შედეგებზე იქნება დამოკიდებული.
1. იბერია 1999 (თბილისი) - 60 ქულა;
2. დინამო (თბილისი) - 59 ქულა;
3. დინამო (ბათუმი) - 58 ქულა;
4. რუსთავი (რუსთავი) - 56 ქულა;
5. ტორპედო (ქუთაისი) - 44 ქულა;
6. დილა (გორი) - 43 ქულა;
7. სამგურალი (წყალტუბო) - 39 ქულა;
8. სპაერი (თბილისი) - 32 ქულა;
9. გაგრა (თბილისი) - 31 ქულა;
10. მეშახტე (ტყიბული) - 23 ქულა.
დინამო თბილისი მომდევნო ტურში, 24 ნოემბერს, გაგრას სტუმრად შეხვდება, ხოლო ტორპედო იმერულ დერბიში სამგურალს ეწვევა (25 ნოემბერს).