VIDEO: ზედიზედ გაფუჭებული 23 სროლა და განიავებული +24 - დეტროიტმა სერია გადაარჩინა

გოგა ბითაძის ორლანდო მეჯიქმა დეტროიტ პისტონსთან სერიის დასრულების მაგარი შანსი ხელიდან გაუშვა და მოედნის უპირატესობაც დაკარგა. ფლორიდელებმა მე-6 შეხვედრა საკუთარ დარბაზში წააგეს - 79:93.

წარმოიდგინეთ, მასპინძლები მე-3 მეოთხედის დასაწყისში 24 ქულით დაწინაურდნენ, თუმცა დარჩენილ დროში იმდენი მოახერხეს, რომ ზედიზედ 23 სროლა გააფუჭეს, 17:55 დამარცხდნენ და აღმოსავლეთ კონფერენციის რეგულარულის საუკეთესო გუნდს სერიაში ანგარიშის გათანაბრების საშუალება მისცეს. მაგარ ქამბექთან ერთად, უმაგრესი მენტალური კრახი!

მეჯიქი 1996-97 წლების სეზონის შემდეგ პირველი გუნდია, რომელიც შინ მინიმუმ 24 ქულით იგებდა და სერიის დასრულების შანსი ვერ გამოიყენა.

დეტროიტელებს კეიდ კანინგემმა (32 ქულა, 10 მოხსნა, 3 ასისტი) და ტობაიას ჰარისმა (22 ქულა, 10 მოხსნა) ორმაგი დუბლით ულიდერეს, ორლანდოელთა შორის კი პაოლო ბანკერო (17 ქულა, 10 მოხსნა, 6 ასისტი) და დესმონდ ბეინი (17 ქულა, 3 მოხსნა, 1 ასისტი) გამოირჩნენ. 

გოგამ პარკეტზე 13:04 წუთი გაატარა - 5-დან 3 ორქულიანი ჩააგდო და 6 ქულა, 4 მოხსნა, 1 ასისტი მიითვალა. 1 დაფარებაც ჰქონდა.

საბოლოოდ, პისტონსმა სერიის პირველ მატჩში დაკარგული მოედნის უპირატესობა დაიბრუნა და გადამწყვეტ, მე-7 თამაშს სახლში, განსაკუთრებული ფსიქოლოგიური უპირატესობის ფონზე ითამაშებს - 3 მაისის 23:30 საათზე.