ჩელსისა და პორტუგალიის ნაკრების ვინგერი პედრო ნეტუ მსოფლიო ჩემპიონატზე ყურადღების ცენტრში მოექცა, თუმცა ამჯერად არა მოედანზე თამაშით, არამედ გარეგნობით.
სოციალურ ქსელებში ის ტურნირის ყველაზე სიმპათიურ ფეხბურთელად შერაცხეს.
ფლორიდაში გამართულ პრესკონფერენციაზე, როდესაც პორტუგალიის ნაკრების პრესატაშემ ნეტუ მედიას სწორედ ამ ტიტულით წარუდგინა, ფეხბურთელმა იუმორით უპასუხა:
საერთოდ არ გამკვირვებია! ეს სრულიად ნორმალური ამბავია. გასახდელში ამაზე არც კი გვისაუბრია, რადგან მთელი გუნდი ერთხმად მეთანხმება, რომ ყველაზე სიმპათიური ვარ
ნეტუმ კრიშტიანუ რონალდუს შესახებაც ისაუბრა და აღნიშნა, რომ უზბეკეთთან (5:0) შესრულებული დუბლის შემდეგ კაპიტნის ბედნიერება მთელ გუნდს გადაედო: „ვიცით, რომ ის გოლებით ცოცხლობს და ეს ჩვენთვის დამატებითი მოტივაციაა“.
პორტუგალიის ნაკრები ჯგუფში მეორე ადგილზეა და პირველი პოზიციის მოსაპოვებლად მომდევნო მატჩში კოლუმბიას დაუპირისპირდება. ნეტუს თქმით, გუნდი პლეი-ოფის მეტოქეების ასარჩევად მათემატიკურ გათვლებს არ აპირებს და მხოლოდ მოსაგებად გავა მოედანზე.
