ვინ დაამყარებს სეზონის ყველაზე გიჟურ რეკორდს?

კილიან მბაპესთვის მიმდინარე სეზონი მადრიდის რეალში კოშმარული გამოდგა: გუნდმა ყველა ტიტული დათმო, თავად ფრანგს კი ბომბარდირობას ვედატ მურიკი ეცილება.

თუმცა, მბაპეს სხვა პერსონალური რეკორდებიც საფრთხეშია და ამჯერად საფრთხე საფრანგეთიდან, კერძოდ კი მონაკოდან მოდის.

ბალოგუნის საოცარი გაფრენა

ფოლარინ ბალოგუნი მბაპესთან ერთად ერთადერთი ფეხბურთელია ტოპ-ლიგებში, რომელმაც ამ სეზონში ზედიზედ 8 მატჩში გაიტანა. თუ ის ტულუზას წინააღმდეგაც გამოიჩენს თავს, მადრიდის რეალის ვარსკვლავის შედეგს გააუმჯობესებს.

არსენალის ყოფილმა აღზრდილმა მონაკოში კარიერა მძიმედ დაიწყო, რისი მიზეზიც ტრავმები იყო. წინა სეზონებში მისი შედეგიანობა დაბალი იყო, თუმცა სებასტიან პოკონიოლის მოსვლამ ყველაფერი შეცვალა: ბალოგუნმა მიმდინარე სეზონის 18 გოლიდან 17 სწორედ ახალი მწვრთნელის ხელში გაიტანა.

გზა რეკორდისკენ

„მან ყველაფერი გააუმჯობესა: ზურგით თამაში, პასი, დაგვირგვინება.. ის მუდმივად სწავლობს“, - აცხადებს პოკონიოლი. თავად ფეხბურთელი კი ამბობს, რომ ახალი მწვრთნელის ხელში თავს უფრო თავისუფლად გრძნობს.

ბალოგუნის მთავარი სამიზნე ახლა სონი ანდერსონის ისტორიული რეკორდია, რომელმაც 2001 წელს ლიონში ზედიზედ 11 მატჩში გაიტანა. თუ ამერიკელი ფორვარდი ტემპს არ დააგდებს, მბაპეს ჩრდილიდან საბოლოოდ გამოსვლას და ლიგა 1-ის ისტორიაში შესვლას შეძლებს.