პეპ გვარდიოლამ ლივერპულთან გამარჯვების (2:1) შემდეგ არსენალთან არსებულ ჩამორჩენაზე ისაუბრა.
„ჩვენ ექვსი ქულით ჩამოვრჩებით. ეს დიდი სხვაობაა, თუმცა ბევრი რამ შეიძლება მოხდეს, ამიტომ სჯობდა, ეს სამი ქულა აგვეღო.
ვინ იცის, ეყოფა თუ არა არსენალს ეს 6 ქულა. 13 ტური ბევრია, წინ ინგლისის თასია, ლიგის თასის ფინალი, მარტში ჩემპიონთა ლიგა განახლდება, იქნება ტრავმებიც. ასევე, ბევრი სხვა გუნდიც იბრძვის მიზნებისთვის — ზოგი ევროთასებისთვის, ზოგიც პრემიერ ლიგაში დასარჩენად. გავარდნის ზონაში მყოფ გუნდებთან მატჩები ნამდვილი ომია, რადგან ისინი ყველაფერს გააკეთებენ.
გამოცდილება მეუბნება, რომ 13 მატჩი საკმაოდ ბევრია. ჩამორჩენის აღმოფხვრა ძალიან რთულია, მაგრამ მნიშვნელოვანია, ახლოს ვიყოთ. ყველაფერი, რაც შეგვიძლია გავაკეთოთ, არსენალს ზურგში სუნთქვაა — ვიყოთ მათთან ახლოს და შევეცადოთ გამოვიყენოთ მათი შეცდომა, თუკი ასეთი მოხდება.
წინ კი მათთან საშინაო მატჩი გველოდება და, რა თქმა უნდა, მოგება გვსურს“, – განაცხადა მანჩესტერ სიტის მთავარმა მწვრთნელმა.
