ვინ მოიგებს ჩემპიონთა ლიგას? - ექსპერტების პროგნოზები

ბუდაპეშტში, პუშკაშ არენაზე ნამდვილი საფეხბურთო ომი გველოდება. ერთმანეთს ტურნირის მოქმედი ჩემპიონი, ლუის ენრიკეს პსჟ და მიკელ არტეტას არსენალი დაუპირისპირდებიან. ორივე გუნდი საკუთარი ქვეყნის ჩემპიონია და ახლა ევროპის უმთავრესი თასის მოგებას გეგმავს.

აი, რას ფიქრობენ ამ მატჩზე საფეხბურთო სამყაროს ცნობილი სახეები:

არსენ ვენგერი:

ვფიქრობ, არსენალმა ნაბიჯ-ნაბიჯ ააშენა ისტორია, რომელიც ახლა ამ თასის მოგების საშუალებას აძლევს. როცა კლუბში მივედი, ჩემპიონთა ლიგაზე თამაშის დიდი გამოცდილება არ გვქონდა. მერე ზედიზედ 20 წელი გავდიოდით ტურნირზე, ახლა კი ამ ყველაფრის გვირგვინი ჩემპიონობა იქნება. არტეტამ გუნდს უდიდესი რწმენა და ერთიანობა უნდა ჩაუნერგოს, რაც ამ სეზონში ისედაც ჰქონდათ და ეს საკმარისი იქნება. დარწმუნებული ვარ, საოცარ ფინალს ვნახავთ.

გარი ნევილი:

გულახდილი ვიქნები და ვიტყვი, რომ არსენალს ძალიან გაუჭირდება, რადგან პსჟ სულ სხვა დონეა. მათ ჰყავთ მწვრთნელი, რომელიც გამარჯვებითაა შეპყრობილი - ნამდვილი მანიაკი საფეხბურთო გაგებით. მათ აქვთ ის „საშინელი“ თვისება, რომ მოგებისთვის ყველაფერს აკეთებენ. ლუის ენრიკეს მომენტია, მას ზედიზედ მეორედ სურს ლიგის მოგება და ყველა რეკორდის მოხსნა. არსენალი აუტსაიდერის სტატუსით გადის მოედანზე, მათ კბილებით მოუწევთ ბრძოლა, პსჟ კი ამჟამად საუკეთესო გუნდია ევროპაში.

ჰარი კეინი:

ეს იქნება ორი სრულიად განსხვავებული სტილის დაპირისპირება, მაგრამ ძალიან თანაბარი თამაში. პსჟ მოქმედი ჩემპიონია და ლოგიკურია, რომ ფავორიტად ითვლება, თუმცა არსენალმა წელს დაამტკიცა, რომ ევროპაში ერთ-ერთი საუკეთესოა. მოედანზე ორი უძლიერესი გუნდი გავა და საინტერესო ბრძოლა იქნება.

მარტინ კიოუნი:

არსენალი გაიმარჯვებს და ეს ჩემთვის საკმარისია. ისინი ისტორიაში პირველად მოიგებენ ჩემპიონთა ლიგას და ამით პირველები გახდებიან. აქამდე ევროპაში გვიჭირდა - თასების მფლობელთა თასი ხელიდან გაგვისხლტა, უეფას თასის ფინალში გალათასარაიმ პენალტებით მოგვიგო... ასე რომ, კლუბს ევროპაში დიდი გამარჯვება ჰაერივით სჭირდება.

პოლ მერსონი:

მიმაჩნია, რომ არსენალს კარგი შანსი აქვს, განსაკუთრებით სტანდარტულების დროს. ყოველი ჯარიმა თუ კუთხური პსჟ-ს კარში პენალტის ტოლფასი იქნება, რადგან პარიზელები ტანმორჩილი გუნდია. პსჟ-ს ამ კომპონენტში სერიოზული პრობლემები ექნება. მოედანზე ერთმანეთს საუკეთესო თავდასხმა და საუკეთესო დაცვა შეხვდება.

კრის უოდლი:

არსენალმა შედეგის მისაღებად მოედანზე ავტობუსი უნდა ჩააყენოს და არტეტას გუნდს ამის გაკეთება შეუძლია. ბაიერნმა პსჟ-სთან ღია ფეხბურთი ითამაშა და დაისაჯა კიდეც. პარიზელებს პრობლემები ზუსტად მაშინ ექმნებათ, როცა ორგანიზებულ, კარგად დაცულ და კონტრშეტევებზე ორიენტირებულ გუნდებს ხვდებიან. არტეტა ფეხბურთელებს ეტყვის, რომ პსჟ-სთან ღია ბრძოლაში არ შევიდნენ. დაცვაში მყარად დგომა, სტანდარტულები და კონტრშეტევები - ესაა არსენალის მოგების ერთადერთი გზა.