ვინისიუს ჟუნიორი - ბრაზილიის ლიდერი და ერთადერთი იმედი

2026 წლის მსოფლიო ჩემპიონატის ჯგუფურ ეტაპზე ბრწყინვალე თამაშის შემდეგ, გაჩნდა განცდა, რომ ვინისიუს ჟუნიორი საერთაშორისო ასპარეზზე საბოლოოდ შედგა.

მადრიდის რეალის სუპერვარსკვლავმა 3 მატჩში 4 გოლი გაიტანა და კარლო ანჩელოტის გუნდი პლეი-ოფში გაიყვანა.

ელიტარულ კომპანიაში და ნეიმარის მემკვიდრეობა

ჯგუფურ ეტაპზე გატანილი ოთხი გოლით ვინისიუსი ბრაზილიური ფეხბურთის ლეგენდების გვერდით დადგა. ის გახდა პირველი ბრაზილიელი ჟაირზინიოს (1970), რომარიოს (1994), რონალდოსა (2002) და რივალდოს (2002) შემდეგ, ვინც მუნდიალის პირველსავე სამ შეხვედრაში შეძლო გოლის გატანა. ეს ნაკრებისთვის კარგი ნიშანი უნდა იყოს, რადგან ყველა ამ წინა შემთხვევაში კანარინიმ ჩემპიონის ტიტული მოიპოვა.

ამასთანავე, ვინი გახდა პირველი ბრაზილიელი 2014 წლის შემდეგ (ნეიმარის მიღწევის მერე), ვინც ერთ მუნდიალზე 4 გოლის გატანა შეძლო. თავად 34 წლის ნეიმარმა, რომელიც გუნდშია, მაგრამ ლიდერის როლი ახალგაზრდა კოლეგას გადაულოცა, შოტლანდიასთან მატჩის (3:0) შემდეგ პირდაპირ თქვა: „ვინი ჩვენი მთავარი ვარსკვლავია, ის საოცარ ფორმაშია და თამაშების ბედს წყვეტს“.

სანაკრებო კარიერის გარდატეხა

მუნდიალის სტარტამდე ვინისიუსის სანაკრებო სტატისტიკა კლუბთან შედარებით საკმაოდ მოკრძალებული იყო - 50-მდე მატჩში მხოლოდ 9 გოლი ჰქონდა გატანილი. თავად ფეხბურთელმაც აღიარა, რომ აქამდე რეალის დონეს ნაკრებში ვერ აჩვენებდა:

იყო პერიოდი, როცა ნაკრებში ჩემს ფეხბურთს ვერ ვთამაშობდი. ჩემი ნიჭისა და მადრიდში გაწეული შრომის წყალობით, მჯეროდა, რომ საჭირო მომენტში ბრაზილიის მაისურით ისევ ავკაშკაშდებოდი და მსოფლიო ჩემპიონატზე ამის დამტკიცება საუკეთესო მომენტია

ანჩელოტის ხარვეზიანი სისტემა და ახალი ფორმულა

მიუხედავად იმისა, რომ ბრაზილიამ ჯგუფში ტოპ-40-ის გუნდებიდან მხოლოდ მაროკოსთან ითამაშა (1:1), სადაც გუნდი სწორედ ვინიმ იხსნა წაგებისგან, ანჩელოტიმ ნელ-ნელა სწორი ფორმულა იპოვა. მეტეუს კუნიას ძირითადში დაყენებამ შეტევას სიღრმე შემატა (თავად კუნიამ უკვე 3 გოლი გაიტანა), ლუკას პაკეტა მოედანზე უზარმაზარ სამუშაოს ასრულებს, ბრუნო გიმარაეშს კი უკვე 3 ასისტი აქვს. დაცვაში ვეტერან დანილოს გამოჩენამ სიტუაცია დაასტაბილურა, ხოლო რაფინიას ტრავმის შემდეგ 19 წლის რაიანმა შოტლანდიასთან კარგი შთაბეჭდილება დატოვა.

წინ ბევრად უფრო რთული გამოცდებია, თუმცა ვინისიუსის მიერ აღებული ტემპი სელესაოს პლეი-ოფის წინ დიდ იმპულსს აძლევს. 1/16 ფინალში ბრაზილიის ნაკრები იაპონიას დაუპირისპირდება.