ვის მისცა მაიკლ ჯორდანმა მის ეპოქაში თამაშის ნებართვა?

მაიკლ ჯორდანი, რომელსაც ბევრი კალათბურთის ისტორიაში საუკეთესოდ მიიჩნევს, არასოდეს გამოირჩეოდა ზედმეტი თავმდაბლობით, თუმცა მან მაინც გამოყო მოთამაშეების ის ექსკლუზიური ჯგუფი, რომელთაც მის ეპოქაში კონკურენციის გაწევა შეეძლებოდათ.

ჩიკაგო ბულსის ლეგენდამ, რომელმაც კარიერაში 6 ჩემპიონობა და 5 MVP-ის ტიტული მოიპოვა, მხოლოდ ოთხი სახელი დაასახელა.

პირველი სიაში კობი ბრაიანტია. ლეიკერსის ხატება, რომელმაც ჯორდანი თავისი თაობის საუკეთესო მოთამაშის პოსტზე შეცვალა. ჯორდანი ყოველთვის აღნიშნავდა კობის დაუჯერებელ ჟინსა და მოგების წყურვილს:

ჩემპიონობების მხრივ, ეს კობი ბრაიანტია. მას გამარჯვება ისე ძლიერ სურდა, რომ მზად იყო უკიდურესობამდე წასულიყო

მეორე რჩეული ლებრონ ჯემსია. მიუხედავად იმისა, რომ ჯორდანი კობისა და ლებრონის შედარებისას უპირატესობას ხშირად ბრაიანტს ანიჭებდა, ის ლებრონის დომინაციას მაინც აღიარებდა:

კალათბურთში დომინირების თვალსაზრისით, ამ ეტაპზე ეს ლებრონია

სიაში ასევე მოხვდა ტიმ დანკანი, რომელმაც მთელი 19-წლიანი კარიერა სან ანტონიო სპურსში გაატარა. დანკანი გამოირჩეოდა სტაბილურობითა და გადამწყვეტ მომენტებში ცივსისხლიანი თამაშით, რაც მას ჯორდანის ეპოქისთვის შესაფერის კანდიდატად აქცევს.

მეოთხე კი დირკ ნოვიცკია. დალას მავერიქსის ლეგენდა და ევროპული კალათბურთის სიმბოლო, რომლის თამაშის სტილიც ჯორდანმა მოკლედ და ზუსტად შეაფასა:

დირკი ძლიერია, ის ჭკვიანია. მან იცის, როგორ ითამაშოს

ჯორდანისგან მსგავსი შეფასება უდიდესი აღიარებაა, რადგან ის იშვიათად თუ გამოყოფდა მოთამაშეებს, რომელთაც 80-იანი და 90-იანი წლების ფიზიკურად მძიმე და აგრესიულ კალათბურთში გაძლება შეეძლოთ.