"ვიცით, რომ არსენალის წინააღმდეგ რთული იქნება" - ხვიჩას კომენტარი მატჩის შემდეგ

ბაიერნთან 1:1-ისა და ჩემპიონთა ლიგის ფინალში ზედიზედ მეორედ გასვლის შემდეგ, ხვიჩა კვარაცხელიამ უეფა-ს რეპორტიორთან შეფასებები გააკეთა.

"ბაიერნი ამჟამად ერთ-ერთი საუკეთესო გუნდია. ეს ძალიან რთული იყო, სეზონში ყველაზე რთული. ჩვენ ვაჩვენეთ, ასეთი გუნდების წინააღმდეგ თამაში როგორ შეგვიძლია.

ვფიქრობ, ძალიან მნიშვნელოვანი იყო, რომ ძალიან სწრაფად გავიტანეთ გოლი. დავინახე, რომ დემბელე მარტო იყო და უბრალოდ ბურთი უნდა მიმეცა მისთვის. მან ეპიზოდი ძალიან კარგად დაასრულა. ჩვენ ვამაყობთ მისით და მთელი გუნდით, რადგან დღეს ვიბრძოლეთ და გუნდური სული საოცარი იყო.

ძალიან ვამაყობთ და ბედნიერები ვართ, რომ ეს კიდევ ერთხელ შევძელით. ფინალისთვის მზად უნდა ვიყოთ, ეს ჩვენს ცხოვრებაში საუკეთესო თამაშია და ამ კლუბისთვის ყველაფერს გავაკეთებთ.

ვიცით, რომ არსენალის წინააღმდეგ რთული იქნება. ზოგადად, ყველა გუნდს პატივს ვცემთ. მნიშვნელოვანია, ჩვენი თამაში ვაჩვენოთ. ნამდვილად არ ვფიქრობთ იმაზე, თუ ვინ იქნება მეტოქე, უბრალოდ ვემზადებით თამაშისთვის და ყველაფერს ვაკეთებთ მოედანზე. რთული იქნება, ეს ჩემპიონთა ლიგის ფინალია - ჩვენ უბრალოდ უნდა წავიდეთ და დავტკბეთ ამით", - თქვა ხვიჩამ.

კვარა პირველია, ვინც ჩემპიონთა ლიგის პლეი-ოფის ზედიზედ 7 შეხვედრაში საგოლე მოქმედება შეასრულა. მონაკოსთან (გოლი), ჩელსისთან (3 გოლი და ასისტი), ლივერპულთან (გოლი და ასისტი) და ბაიერნთან (2 გოლი და ასისტი).

ქართველმა შემტევმა ჩემპიონთა ლიგის მიმდინარე გათამაშებაზე მე-16 საგოლე მოქმედება მიითვალა - 10 გოლი, 6 ასისტი.

ყველა ტურნირის ეგიდით, ხვიჩამ ბოლო 12 შეხვედრაში 11 გოლი და 4 ასისტი შეასრულა. ჯამში 2025-26 წლების საკლუბო სეზონში ჩატარებულ 43 მატჩში 18 გოლი და 10 საგოლე პასი აქვს.

არც კვარა, არც დემბელე - ვინ გახდა მატჩის MVP