ზედიზედ მეექვსედ ევრობასკეტზე გავედით!

ევრობასკეტ 2025-ის საკვალიფიკაციო ეტაპის გადამწყვეტ მატჩში საქართველოს ნაკრებმა თბილისი არენაზე დანია მიიღო.

შეხვედრა საკმაოდ დაძაბული გამოდგა და გამარჯვებულის ვინაობა ბოლო წამამდე უცნობი იყო.

საბოლოოდ მძიმე ბრძოლაში საქართველოს ნაკრებმა 62-60 იმარჯვა და ევრობასკეტზე ზედიზედ მეექვსედ გავიდა.

ჩვენი გუნდიდან გამორჩეულები თორნიკე შენგელია და დუდა სანაძე იყვნენ.

კაპიტანმა 35 წუთში 19 ქულა, 13 მოხსნა და 4 შედეგიანი გადაცემა დააგროვა. შენგელიამ 11-დან 10 საჯარიმო ზუსტად შეასრულა.

დუდა სანაძემ კი 31 წუთში 16 ქულა და 4 მოხსნა მიითვალა, მისი თამაში განსაკუთრებით გამორჩეული ბოლო მეოთხედში იყო.

საქართველოს ნაკრებს აქამდე 5 ევრობასკეტზე (2011, 2013, 2015, 2017 და 2022) აქვს ნათამაშები, 2025-ში კი ევროპის ჩემპიონატზე ზედიზედ მეექვსედ ვიასპარეზებთ.

VIDEO: ევრობასკეტზე გასვლის ემოციები