VIDEO: ბრინჯაო განაღდებულია! ლაშა გურული მსოფლიო ჩემპიონატის 1/2 ფინალშია

ინგლისის ქალაქ ლივერპულში კრივის მსოფლიო ჩემპიონატი მიმდინარეობს.

ლაშა გურულმა პირველ ბრძოლაში საუდის არაბეთის წარმომადგენელი მუშა ალჰავსავი მსაჯთა ერთსულოვანი გადაწყვეტილებით დაამარცხა.

ქართველმა მოკრივემ ტურნირზე თავის მეორე ბრძოლაში ირლანდიელი მეტოქე, დინ ქლენსი დაამარცხა და მეოთხედფინალში გავიდა.

მეოთხედფინალში ლაშა გურულმა ინდოელ აბჰინაშ ჯამვალსაც მოუგო და ბრინჯაოს მედალი გაინაღდა - ქართველი -65 კგ. კატეგორიაში მსოფლიოს ჩემპიონობისთვის ბრძოლას განაგრძობს.

ლაშა მსოფლიო ჩემპიონატის ნახევარფინალში კარიერაში მესამედ გავიდა, მას 2021 და 2023 წლებში ბრინჯაოს მედალი აქვს მოპოვებული.

გურული ნახევარფინალში უზბეკ ასადხუჯა მუიდინხუჯაევს დაუპირისპირდება. მეორე ფინალისტის ვინაობას კი კუბელი ოლიმპიური ჩემპიონი ერისლანდი ალვარესი და ბრაზილიელი იური ფალკაო გაარკვევენ.

კრივის მსოფლიო ჩემპიონატი 14 სექტემბრამდე გაგრძელდება.