VIDEO: რონი ო'სალივანმა რეკორდული 153-ქულიანი ბრეიკი შეასრულა

რონი ო'სალივანი სნუკერში კიდევ ერთი ისტორიული მიღწევის ავტორი გახდა.

სნუკერის ლეგენდარულმა მოთამაშემ იუშანში გამართულ მსოფლიო ღია პირველობაზე პროფესიულ დონეზე ყველაზე მაღალი ბრეიკი, 153 ქულა დააფიქსირა.

შვიდგზის მსოფლიო ჩემპიონმა ო'სალივანმა ეს ახალი რეკორდი თავისი მეოთხედფინალური მატჩის პირველ ფრეიმში დაამყარა უელსელ რაიან დეის წინააღმდეგ, რაც საბოლოოდ 5-0 დამაჯერებელი გამარჯვებით დასრულდა.

ფრეიმის დასაწყისში 50 წლის ო'სალივანმა დეი რთულ მდგომარეობაში ჩააყენა, ხოლო უელსელის მიერ შეცდომით შესრულებულმა დარტყმამ მას თავისუფალი ბურთი მისცა.

მან მწვანე ბურთი დამატებით წითლად ჩათვალა, შემდეგ შავი ბურთი ჩააგდო და ამის შემდეგ 15 წითელი, 13 დამატებითი შავი და ორი ვარდისფერი ბურთი მიაყოლა, ბოლოს კი დარჩენილი ექვსი ფერადი ბურთი ჩააგდო და 153 ქულას მიაღწია.

რონიმ გადააჭარბა წინა რეკორდს, 148 ქულას, რომელიც შოტლანდიელმა ჯეიმი ბერნეტმა 2004 წელს UK Championship-ის საკვალიფიკაციო ეტაპზე დაამყარა.

„მინდა დიდი მადლობა გადავუხადო ყველას, ვინც მომწერა და მომილოცა 153 ქულა,“ - განაცხადა ო'სალივანმა ვიდეოში, რომელიც X-ზე გამოქვეყნდა.

ეს მართლაც მაგარი მომენტი იყო, ძალიან ბედნიერი ვარ, რომ ეს შევძელი. მადლობა ყველას, ვინც მხარს მიჭერს.

სნუკერში მაქსიმალური ბრეკი 147 ქულაა - ეს მიიღწევა მაშინ, როცა მოთამაშე 15 წითელ ბურთს თითოეულზე შავის დამატებით აგდებს, შემდეგ კი ექვსივე ფერად ბურთს თანმიმდევრობით ასრულებს.

თუმცა, თეორიულად ყველაზე მაღალი შესაძლო ბრეკი 155 ქულაა. ეს ხდება მაშინ, როცა მოთამაშეს ეძლევა თავისუფალი ბურთი, მას ჩააგდებს როგორც დამატებით წითელს, შემდეგ შავს, და ამის შემდეგ აგრძელებს 15 წითლისა და შავების სერიას, ბოლოს კი ყველა ფერად ბურთს ასრულებს.

„შემეძლო კიდევ ერთი შავის აღება, მაგრამ ვიფიქრე, მგონი ტელევიზიით 147-ზე მეტი არავის დაუფიქსირებია, ამიტომ გადავწყვიტე პირველი ვყოფილიყავი,“ - თქვა ო'სალივანმა.

მე უკვე ბევრი რამეში ვიყავი პირველი, ამიტომ ვიფიქრე, ესეც მიმემატებინა. თავს ბედნიერად ვგრძნობ, რომ ასეთი მიღწევების შესაძლებლობა მაქვს.

მან ასევე ისაუბრა იმაზე, თუ როგორ ინარჩუნებს სნუკერისადმი ინტერესს: „მე არასდროს დამიფიქსირებია 147-ზე მეტი. ჩემთვის მთავარი არის ემოცია, ადრენალინი.

თუ ეს ემოცია და მუხტი არსებობს, მაშინ შემიძლია დიდი საქმეების გაკეთება. უნდა ვგრძნობდე, რომ ბოლოს კარგი შედეგი მელოდება. ეს კონცენტრაციას აძლიერებს და გონებას უფრო მკვეთრს ხდის.“

მიუხედავად იმისა, რომ პროფესიულ ტურნირში ასეთი შედეგი ჯერ არ დაფიქსირებულა, World Snooker-ის ინფორმაციით, „რამდენიმე მოთამაშემ 155 ქულა სავარჯიშო მატჩებში უკვე დააფიქსირა“.

ო'სალივანის 153 ქულაზე რეაგირებისას, ყოფილმა მსოფლიო ჩემპიონმა ნილ რობერტსონმა თქვა:

ყველა დროის საუკეთესო, ვინც ოდესმე ყოფილა და ვინც ოდესმე იქნება. სნუკერის გულშემატკივრებო, იმედია, დააფასეთ ის სიხარული, რაც მან ოთხი ათწლეულის განმავლობაში მილიონებს მოუტანა.

ნახევარფინალში ო'სალივანი ჩინელ ვუ იიძეს შეხვდება, რომელმაც ჩრდილოეთ ირლანდიელი მარკ ალენი 5-1 დაამარცხა.