ინგლისის პრემიერ ლიგის 24-ე ტურში ლიდსმა საკუთარ მოედანზე ცხრილის ლიდერი არსენალი მიიღო და 0-4 განადგურდა.
ლონდონელებმა უპირატესობა პირველივე ტაიმში მოიპოვეს. 27-ე წუთზე ნონი მადუეკეს საჯარიმოში ჩაწოდების შემდეგ, მარტინ სუბიმენდიმ ანგარიში თავური დარტყმით გახსნა.
38-ე წუთზე გოლი მადუეკეს კიდევ ერთ ჩაწოდებასა და არსენალის მორიგ კუთხურს მოჰყვა. კარლ დარლოუსა და დომინიკ კალვერტ-ლუინის შეუთანხმებელი თამაშის შედეგად ავტოგოლი დარლოუს ანგარიშზე ჩაიწერა.
მეორე ტაიმში არტეტას გუნდმა უპირატესობა კიდევ უფრო გაზარდა. 69-ე წუთზე გაბრიელ მარტინელის პასს ვიქტორ გიოკერესის გოლი მოჰყვა, 86-ე წუთზე კი შეხვედრას წერტილი გაბრიელ ჟესუსმა დაუსვა.
არსენალმა ამ გამარჯვებით პრემიერ ლიგაში 3-მატჩიანი მოუგებელი სერია შეწყვიტა და 53 ქულა დააგორვა. ლაივ ცხრილში არტეტას შეგირდებს მანჩესტერ სიტისთან და ასტონ ვილასთან 7-ქულიანი უპირატესობა აქვთ, თუმცა სიტი ამ ტურში ტოტენჰემს სტუმრობს, ასტონ ვილა კი ბრენტფორდს მიიღებს.
