ჩემპიონობისკენ მიმავალი გზა - იბერიას მორიგი მნიშვნელოვანი მატჩი

საქართველოს ეროვნული ლიგის მიმდინარე სეზონი დასკვნით, ყველაზე დაძაბულ და საინტერესო ფაზაში შევიდა.

ჩემპიონობისთვის მებრძოლი იბერია 1999 უმაღლესი მიზნებისთვის ილაშქრებს და ყოველ მომდევნო ტურში ამტკიცებს, რომ ქვეყნის მთავარი საფეხბურთო ტიტულის მოპოვების უმთავრესი პრეტენდენტია.

32-ე ტურის ეგიდით, იბერია 1999 საკუთარ კედლებში, მიხეილ მესხის სახელობის სტადიონზე გაგრას უმასპინძლებს. შეხვედრა 9 ნოემბერს, 20:00 საათზე გაიმართება და ჩემპიონობის მაძიებელი მასპინძლებისთვის მას სასიცოცხლო მნიშვნელობა ექნება. 

მატჩის წინ 3 საინტერესო ფაქტი იკვეთება, რომელიც თბილისური კლუბის აშკარა უპირატესობასა და სიძლიერეს უსვამს ხაზს:

აბსოლუტური დომინაცია ურთიერთშეხვედრებში - ამ გუნდებს შორის ჩატარებული 21 ოფიციალური მატჩიდან, იბერია 1999 შთამბეჭდავი უპირატესობით ლიდერობს. თბილისელებს 14 გამარჯვება აქვთ მოპოვებული და მეტოქეს მხოლოდ 4-ჯერ დანებდნენ, 3 შეხვედრა კი ფრედ დასრულდა. ეს სტატისტიკა ნათლად აჩვენებს, თუ რამხელა კლასობრივი სხვაობაა ამ გუნდებს შორის.

შემტევი ფეხბურთი და გოლების წვიმა - იბერია 1999 გაგრასთან ყოველთვის სანახაობრივ, დომინანტურ და შედეგიან ფეხბურთს თამაშობს. 21 დაპირისპირებაში ჯამში 64 გოლი გავიდა (საშუალოდ 3-ზე მეტი ერთ მატჩში), საიდანაც ლომის წილი, 41 გოლი, სწორედ იბერიას ფეხბურთელების ანგარიშზეა, გაგრამ კი მხოლოდ 23-ჯერ შეძლო მეტოქის კარის აღება.

საჩემპიონო მოტივაცია და მიზანი - სატურნირო ცხრილში იბერია 1999 მეორე პოზიციას იკავებს და ლიდერ დინამო ბათუმთან სხვაობის აღმოსაფხვრელად თავდაუზოგავად იბრძვის. მაშინ, როცა გაგრა მე-8 ადგილზეა და მხოლოდ ლიგაში ადგილის შენარჩუნებაზე ფიქრობს, იბერიას ფეხბურთელებისთვის მოედანზე გასვლა მხოლოდ ერთ მიზანს - ოქროს მედლებისკენ მორიგი დიდი ნაბიჯის გადადგმას ემსახურება.

ახლა მთავარია, გულშემატკივარი მივიდეს ტრიბუნაზე და მხარი დაუჭიროს გუნდს, რომელიც მიმდინარე სეზონში მართლაც გამორჩეულ და ლამაზ ფეხბურთს გვთავაზობს. შანსი დიდია და იბერია 1999 ამ შანსს აუცილებლად გამოიყენებს!