დოლიძის რევანში, გოლები და ასისტები ტოპ ლიგებში - ქართული შაბათ-კვირა

გასული შაბათ-კვირა ქართულ სპორტში წარმატებული აღმოჩნდა. ქართველმა სპორტსმენებმა ინდივიდუალურად თუ გუნდურად გამორჩეული შედეგები დააფიქსირეს.

იტალიის ქალაქ პიზაში ჩატარებულ პარაფარიკაობის მსოფლიო თასზე, ხმლით ფარიკაობაში ირმა ხეცურიანმა ოქროს მედალი მოიპოვა, ნინა თიბილაშვილი კი ბრინჯაოს პრიზიორი გახდა.

პროფესიონალურ კრივში სადებიუტო ბრძოლა მშობლიურ ქალაქ რუსთავში გამართა ოლიმპიურმა პრიზიორმა, ლაშა გურულმა. ქართველის მეტოქე 6-რაუნდიან ბრძოლაში დაუმარცხებელი განელი მოკრივე ბერნარდ აბეი იყო. ქართველმა სანახაობრივ ბრძოლაში მოწინააღმდეგე ქულებით დაამარცხა და დებიუტი გამარჯვებით აღნიშნა.

ლას ვეგასში UFC Fight Night-ის მთავარ ბრძოლაში ერთმანეთს რომან დოლიძე და მარვინ ვეტორი დაუპირსპირდნენ. 2 წლის წინ პირველი შეხვედრა ვეტორის გამარჯვებით დასრულდა ახლა კი ქართველები რევანშის მოლოდინში ვიყავით. საბოლოოდ რევანში შედგა და 5-რაუნდიან ბრძოლაში რომანმა მსაჯების ერთსულოვანი გადაწყვეტილებით მოიგო.

დოლიძე: "წართმეული გამარჯვების დაბრუნება მინდოდა"

რაგბი ევროპის ჩემპიონატის ფინალში საქართველოს ნაკრები თბილისში, მიხეილ მესხის სახელობის სტადიონზე ესპანეთს დაუპირისპირდა და მეტოქე 46-28 დაამარცხა. ბორჯღალოსნები რაგბი ევროპის ჩემპიონატის გამარჯვებულები ზედიზედ მერვედ და ჯამში მეჩვიდმეტედ გახდნენ.

50 ლელო - ტაბუცაძე ყველა დროის ხუთეულს უახლოვდება

ქართული საფეხბურთო უიქენდი გოლით კრაიოვას ნახევარმცველმა, ანზორ მექვაბიშვილმა გახსნა, რომელმაც რუმინეთის ჩემპიონატში უნივერსიტატეა კლუჟის კარი აიღო.

საოცარი გამოუვიდათ კვირა დღე საქართველოს ნაკრების მოთამაშეებს. ლიგა 1-ში, ლე ავრთან მატჩში გიორგი მიქაუტაძე მოედანზე მაშინ შევიდა, როცა მისი გუნდი აგებდა, ქართველმა კი 3 გოლი შექმნა. მან 2-ჯერ თანაგუნდელს გაატანინა, ერთხელ კი საოცარი დარტყმით თავად შეძლო თავის გამოჩენა. ამ თამაშით მიქაუტაძე ლიგა 1-ის კვირის გუნდში მოხვდა.

ესპანეთის ლა ლიგა 2-ში, უესკასთან შეხვედრაში, 91-ე წუთზე, როცა ანგარიში 1-1 იყო, გიორგი ქოჩორაშვილმა საგოლე გადაცემა გააკეთა, რომელიც გოლად ალექს ფორესმა აქცია და ლევანტეს 3 ქულა მოუტანა. ამ გამარჯვებით ლევანტე 56 ქულით ლა ლიგა 2-ის სატურნირო ცხრილში გალიდერდა ლა ლიგაში აღზევების ერთ-ერთი მთავარი კანდიდატია.

VIDEO: ქოჩორაშვილის საგოლე გადაცემა - ლევანტემ ბოლო წუთებზე მოიგო

ავსტრიის ბუნდესლიგაში პენალტი ზუსტად შეასრულა ოთარ კიტეიშვილმა, შტურმმა კი ლასკი 4-2 დაამარცხა და სატურნირო ცხრილს სათავეში ჩაუდგა.

თავისი სადებიუტო გოლი გაიტანა კოპენჰაგენში გიორგი გოჩოლეიშვილმა, თუმცა მისმა გუნდმა დანიის ჩემპიონატში ვიბორგთან წააგო.

VIDEO: გოჩოლეიშვილის ბრწყინვალე სადებიუტო გოლი კოპენჰაგენში

ლიგა 1-ში თავი გამოიჩინა ზურიკო დავითაშვილმაც, რომელმაც მონპელიესთან მატჩში საგოლე გადაცემა მიითვალა, სენტ-ეტიენი მეტოქეს ამარცხებდა, თუმცა გულშემატკივართა მოქმედების გამო თამაში ჩაიშალა.

ქართული ბენეფისი ვიხილეთ კიდევ ერთ ტოპ ჩემპიონატში. გერმანიის ბუნდესლიგის მატჩში ბუდუ ზივზივაძემ ჰოლშტაინ კილს გოლი გაუტანა და 2 საგოლე გადაცემაც მიითვალა. ჰაიდენჰაიმმა მეტოქე დაამარცხა, ქართველი თავდამსხმელი კი ბუნდესლიგის კვირის გუნდში მოხვდა.

ბუდუ და ჟორჟი - 2 ქართველი ევროპის ტოპ 5 ჩემპიონატის კვირის გუნდში

უიქენდი წარმატებით დაასრულა საქართველოს ხელბურთის ნაკრებმა, რომელმაც 3-დღიან მონაკვეთში ბოსნიისა და ჰერცეგოვინის ნაკრები მეორედ დაამარცხა, ამჯერად გასვლაზე (20-22) და ევროპის ჩემპიონატის საკვალიფიკაციო ეტაპის ჯგუფში მე-2 ადგილს იკავებს.