გერმანია დებიუტანტს ხვდება, ნიდერლანდები 2010 წელს იხსენებს

17 სთ წინ · 0 წთ წასაკითხად

ფონტის ზომა

მსოფლიო ჩემპიონატი სტარტის შემდეგ 14 ივნისს მდიდარი სათამაშო დღით გრძელდება.

ორ ჯგუფში გასამართი შეხვედრები არაერთ საინტერესო ისტორიას გვთავაზობს, ხოლო თითოეულ მატჩში ისტორიის დაწერის შესაძლებლობა არსებობს.

ჰიუსტონში ოთხგზის მსოფლიო ჩემპიონი გერმანია E ჯგუფის პირველ შეხვედრაში კიურასაოს დაუპირისპირდება - ყველაზე პატარა ქვეყანას, რომელმაც ოდესმე მსოფლიო ჩემპიონატის საგზური მოიპოვა.

ამის შემდეგ, ფილადელფიაში ეკვადორი და კოტ-დ’ივუარი წარმატებული სტარტის აღებას შეეცდებიან.

F ჯგუფში, დალასში, ერთმანეთს ორი ძლიერი გუნდი - იაპონია და ნიდერლანდები შეხვდებიან, ხოლო დღეს მონტერეიში შვედეთისა და ტუნისის დაპირისპირება დაასრულებს.

გერმანია - კიურასაო (14 ივნისი, 20:00)

ამ შეხვედრაში ისტორია აუცილებლად დაიწერება, რადგან კიურასაო მსოფლიო ჩემპიონატზე თავის პირველ მატჩს გამართავს და მეტოქედ ოთხგზის ჩემპიონი გერმანია ეყოლება.

კარიბულმა გუნდმა, რომელსაც გამოცდილი ნიდერლანდელი სპეციალისტი დიკ ადვოკატი ხელმძღვანელობს, კონკაკაფის შესარჩევ ეტაპზე შესანიშნავად იასპარეზა და B ჯგუფში იამაიკას აჯობა, რითაც მსოფლიოს ჩემპიონატის ფინალურ ეტაპზე გავიდა.

გერმანიამ კი ევროპის ზონაში ნელი სტარტის შემდეგ A ჯგუფი წარმატებით დაასრულა და ჩრდილოეთ ამერიკაში გასამართ ტურნირზე ადგილი მოიპოვა.

ეს იქნება არა მხოლოდ მსოფლიო ჩემპიონატის პირველი დაპირისპირება ამ გუნდებს შორის, არამედ ისტორიაში მათი პირველი ოფიციალური შეხვედრა.

სავარაუდო შემადგენლობები

გერმანია - ნოიერი; კიმიხი, ტა, შლოტერბეკი, ბრაუნი; პავლოვიჩი, ნმეჩა; ვირცი, მუსიალა, სანე; ჰავერცი.

კიურასაო - რუმი; ფონვილი, ბაზური, ფლორანუსი, გაარი, ობისპო; ჯ. ბაკუნა, კომენენსია, ლ. ბაკუნა; ჩონგი, ლოკადია.

კოტ-დ’ივუარი - ეკვადორი (15 ივნისი, 03:00)

E ჯგუფის კიდევ ერთ შეხვედრაში კოტ-დ’ივუარი და ეკვადორი ისტორიაში პირველად დაუპირისპირდებიან ერთმანეთს.

„ლა ტრი“ სამხრეთ ამერიკის შესარჩევ ციკლში ბრწყინვალედ გამოვიდა და საბოლოო ცხრილში მხოლოდ არგენტინას ჩამორჩა.

კოტ-დ’ივუარმა კი მსოფლიო ჩემპიონატის საგზური საკვალიფიკაციო ჯგუფში გაბონის დამარცხებით მოიპოვა.

სავარაუდო შემადგენლობები

კოტ დ'ივუარი - ფოფანა; კონანი, კოსუნუ, აგბადუ, დუე; კესიე, სანგარე, ფოფანა; ინაო ოულაი, დიომანდე; გესანი.

ეკვადორი - გალინდესი; ფრანკო, ორდონესი, პაჩო, ინკაპიე; კაისედო, ვიტე, იებოა; პლატა, ვალენსია, ანგულო.

ყველაფერი, რაც E ჯგუფის შესახებ უნდა იცოდეთ - მუნდიალი 2026

იაპონია - ნიდერლანდები (15 ივნისი, 00:00)

F ჯგუფის პირველ ტურში მსოფლიო ფეხბურთის ორი მძიმეწონოსანი, ნიდერლანდები და იაპონია, ერთმანეთს დაუპირისპირდებიან.

„სამურაი ბლუ“ ზედიზედ მერვედ ითამაშებს მსოფლიო ჩემპიონატზე და ტურნირზე მასპინძელი ქვეყნების გარდა პირველი გუნდი იყო, რომელმაც საგზური გაინაღდა.

იაპონიამ აზიის ზონის მესამე ეტაპი დასრულებამდე 3 ტურით ადრე წარმატებით გადალახა.

სამგზის ფინალისტმა ნიდერლანდებმა კი საკვალიფიკაციო ეტაპი დაუმარცხებლად ჩაატარა და UEFA-ს G ჯგუფში პირველი ადგილი დაიკავა, რითაც მსოფლიო ჩემპიონატის ფინალურ ეტაპზე მეთორმეტედ გავიდა.

სავარაუდო შემადგენლობები

ნიდერლანდები - ვერბრუგენი; დუმფრისი, ვან ჰეკე, ვან დაიკი, ვან დე ვენი; დე იონგი, რეინდერსი, გრავენბერხი; მალენი, დეპაი, გაკპო.

იაპონია - სუძუკი; ჰ. იტო, იტაკურა, ტომიასუ; დოანი, კამადა, სანო, ნაკამურა; კუბო, იტო, უედა.

ნიდერლანდები და იაპონია ერთმანეთს 2010 წლის მსოფლიო ჩემპიონატზეც შეხვდნენ, როდესაც ორივე გუნდი E ჯგუფში იყო. დაძაბული მატჩი უესლი სნეიდერის მეორე ტაიმში გატანილმა გოლმა გადაწყვიტა.

„ნარინჯისფრებმა“ საბოლოოდ ფინალამდე მიაღწიეს, სადაც ესპანეთთან დამარცხდნენ, ხოლო იაპონია ჯგუფიდან მეორე ადგილით გავიდა, თუმცა მერვედფინალში პარაგვაისთან პენალტების სერიაში დამარცხდა.

შვედეთი - ტუნისი (15 ივნისი, 06:00)

ევროპის პლეი-ოფის წარმატებით გადალახვის შემდეგ შვედეთი მსოფლიო ჩემპიონატის კამპანიას მონტერეიში ტუნისთან მატჩით დაიწყებს.

აფრიკული ნაკრები შეეცდება წარმატებული სტარტი აიღოს, განსაკუთრებით იმის შემდეგ, რაც 2022 წლის ყატარის მსოფლიო ჩემპიონატზე ჯგუფური ეტაპის დაძლევა ვერ მოახერხა.

შვედეთისთვის ეს 2018 წლის რუსეთის მუნდიალის შემდეგ პირველი მსოფლიო ჩემპიონატის გახსნითი შეხვედრა იქნება. მაშინ სკანდინავიელებმა სამხრეთ კორეა 1:0 დაამარცხეს.