ახლო აღმოსავლეთში არსებული კონფლიქტის გამო, ტურნირის დაწყებამდე ორი თვით ადრე მსოფლიო ჩემპიონატზე ირანის მონაწილეობა კითხვის ნიშნის ქვეშ იდგა, თუმცა ინფანტინო დარწმუნებულია, რომ გუნდი ამერიკაში ჩავა.
„ირანი ჩამოვა, ამაში ეჭვი არ მეპარება“, - აღნიშნა ინფანტინომ ვაშინგტონში გამართულ ღონისძიებაზე. მან იმედი გამოთქვა, რომ მსოფლიო ჩემპიონატის დაწყებისთვის (11 ივნისი) რეგიონში მშვიდობა დაისადგურებს. „ირანი უნდა ჩამოვიდეს, საკუთარი ხალხი უნდა წარმოადგინონ. მათ კვალიფიკაცია გაიარეს და ფეხბურთელებს თამაში სურთ“, — დაამატა ფიფას ხელმძღვანელმა.
ირანის მონაწილეობა სათუო გახდა 28 თებერვალს ამერიკის შეერთებულ შტატებთან და ისრაელთან დაწყებული ომის გამო. ინფანტინომ ირანის ნაკრების მონაწილეობა მას შემდეგ დაადასტურა, რაც აშშ-ის პრეზიდენტმა დონალდ ტრამპმა ერთ-ერთ გამოსვლაში მიანიშნა, რომ ირანელი ფეხბურთელები შტატებში შესაძლოა უსაფრთხოდ არ ყოფილიყვნენ.
კონფლიქტის დასაწყისში ირანი მსოფლიო ჩემპიონატის ბოიკოტზე საუბრობდა, შემდეგ კი ფიფას სთხოვა, მისი მატჩები ამერიკიდან მექსიკაში გადაეტანათ, თუმცა ეს მოთხოვნა არ დაუკმაყოფილეს. ირანი G ჯგუფშია, სადაც ლოს-ანჯელესში ახალ ზელანდიასა და ბელგიას, ხოლო სიეტლში ეგვიპტეს დაუპირისპირდება.
