ხვიჩა კვარაცხელია ისტორიულ სვლაზე

ოთხშაბათს საღამოს ხვიჩა კვარაცხელიამ კიდევ ერთი საოცარი ჩემპიონთალიგური საღამო გვაჩუქა ქართველ, პარიზელ და მსოფლიო ფეხბურთის გულშემატკივრებს.

ხვიჩამ ბეჭდური თუ ინტერნეტ მედიის “ჰედლაინები” დაიკავა. გამორჩეული იყო “433-ის” პოსტი წარწერით:

კვარადონა ისევ თავის სტიქიაში

"პარი სენ-ჟერმენმა" უშანსოდ, 2-0 დაამარცხა "ლივერპული" და საპასუხო მატჩის წინ კომფორტული უპირატესობა მოიპოვა. ისე როგორც წინა ორ მერვედფინალურ დაპირისპირებაში, კვარაცხელია აქაც მთავარ მოქმედ პირად მოგვევლინა.

ბრწყინვალე იყო როგორც დაცვაში, ისე შეტევაში. ეს ყველაფერი კი 65-ე წუთზე გატანილი საოცარი გოლით დააგვირგვინა. ჟოაო ნევეშთან გათამაშებული კომბინაცია, უკან ჩამოტოვებული მერსისაიდელი მცველები და  გიორგი მამარდაშვილი. კიდევ ერთი ცრუ მოძრაობა, დაუცველ კარში შეგორებული ბურთი და დამსახურებული “დღის გოლის” ჯილდო.

კვარასთვის ეს მე-4 გოლი იყო ბოლო 4 საპლეიოფო თამაშში, რაც პსჟ-ს ისტორიაში აქამდე არავის გაუკეთებია. ასევე ზედიზედ მესამედ გახდა მატჩის საუკეთესო ფეხბურთელი.

ამ სეზონში, უდიდეს ევროპულ სცენაზე, ხვიჩამ 12 მატჩში 8 გოლსა და 4 საგოლე გადაცემას მოუყარა თავი. ამ შედეგით, გოლს პლუს საგოლე გადაცემის სისტემით მხოლოდ ხულიან ალვარესსა (13) და კილიან მბაპეს (15) ჩამორჩება. 

საოცარ ციფრებს ემატება უმაღლესი ხარისხი თამაშის ყველა ასპექტში და “ქლაჩი”, რაც გადამწყვეტ მომენტებში თავის გამოჩენას გულისხმობს. ამ ყველაფრის ფონზე, შეგვიძლია ვიფიქროთ, რომ ქართველს დიდი შანსი ექნება ჩემპიონთა ლიგის საუკეთესო ფეხბურთელის ჯილდოზე გაიწიოს. 

ამ ჯილდოს მოგების შემთხვევაში ხვიჩა ისეთი ფეხბურთელების სიას შეუერთდება, როგორებიც არიან კრიშტიანუ რონალდუ, ლიონელ მესი, ანდრეს ინიესტა, ლუკა მოდრიჩი და სხვები…